Corona: Aaqqissuussaq tunillaassuiffiusoq peqqinnissaqarfimmi pivoq

Peqqinnissaqarfiup iluani aaqqissuinermi tunillaassuuttoqarpoq.

Tamanna peqqinnissaqarfimmi qullersaqarfiup Sermitsiaq.AG-mut uppernarsarpaa.

Ataatsimiinnissaq siornatigut kinguartinneqarnikuusimagaluartoq, maannali peqqinnissaqarfimmi nunap immikkoortortaqarfiini tallimaasunit Danmarkimiillu peqataaffigineqartoq sapaatip akunnera kingulleq ingerlanneqarsimasoq, peqqinnissaqarfiup qullersaqarfiata paasissutissiissutigaa.

- Sapaatip akunnerata siuliani ataatsimiinermi ajoraluartumik Covid-19 tuniluuppoq. Ataatsimiinnermi peqataasuni nunap immikkoortuini peqqinnissaqarfiit tallimat tamarmik peqataatitaqarput, Danmarkimiillu aamma ataatsimeeqataasoqarluni, peqqinnissaqarfiup qullersaqarfia paasissutissiivoq.

Naammassillutik akiuussusersorneqarsimasut

26-t nutaat tunillatsittut nunatta nakorsaaneqarfiata marlunngormat paasissutissiissutigaa, taakkunannga arlallit aaqqissuussami aalajangersimasumi peqaataasimapput. Ataatsimiinnermi peqataasut tunillatsissimasut kommuniminnut utereerlutik paasivaat. Maannalu tunillatsissimasut tamarmik kommunini tamani siaruarsimapput.

Tunillatsittut Ilulissani, Aasianni, Sisimiuni Nuummi Qaqortumilu marlunngornermi paasineqarput.

Tunillatsittut nutaat 26-t - aaqqissuussami arlallit peqataasimapput

Peqataasut tamarmik coronavirusimut akiuussusersorneqarsimasut aaqqissuussarlu corona pillugu maleruaqqusanut unioqqutitsilluni ingerlanneqarsimanngitsoq, peqqinnissaqarfiup qullersaqarfiata erseqqissaatigaa.

- Aaqqissuussami malittarisassat tamarmik malinneqarput. Soorlu aamma peqataasut tamarmik naammassillutik akiuussusersorneqarsimanissaat piumasaqaataavoq.

- Pisup takutippaa qanorluunniit maleruaqqusanik malinnitsigigaluaraanni inuiaqatigiinni tuniluunneq ima annertutigaaq, allaat tuniluuneq taamaattoq takuneqarataannaalluni. Taamaammat napparsimasoqalersillugu ingerlaannaq qisuariartoqartariaqarpoq tuniluunneq annertusissanngippat, peqqinnissaqarfimmi qullersaqarfik allappoq.