Corona-virusi kikkunnit ersigineqarnerpaava?
Kikkut napparsimalernissartik ernumassutigaat – aamma ajornartorsiornerup nalaani oqartussat nunamik aqutsinerat qanoq ajunngitsigisimava ajortigisimavaluunniit? Innuttaasut apeqqutini taakkunani siullermeerlutik isumasiorneqarput.
Covid-19-imik nappaalanerup nunarsuarmi innuttaasut qaammatini arlalinni ersiortitarisimavai.
Kisianni annilaanganeq Kalaallit Nunaanni qanoq annertutigisumik atugaasimava? Naalakkersuisullu kiisalu nunatta nakorsaanerata suliniarsimanerat innuttaasunit qanoq naliliiffigineqarpa?
Aviisi AG taama allappoq.
Tamanna HS Analysemit misissuiffigineqarsimavoq innuttaasut inersimasut innuttaasut agguataarsimanerannut naapertuuttut apeqquteqarfiginerisigut; inuit nunatsinnit tamarmeersut katillugit 706-it.
Pingaarnertut maluginiarneqarsinnaavoq, innuttaasut akornanni ernumasoqaarnera. Kisianni innuttaasut ilarpassui sakkortunngitsumik qisuariaateqarsimapput. Aperineqartut 12 procentii akipput, inuttut coronamik eqqugaanissaq »ersigisorujussuugitsik« 27 procentillu »ersigilaaritsik«.
Tamatuma akerlianik 36 procentit »ersivallaanngillat« 25 procentillu »ersinngilluinnarlutik«. Ernumaneq angutinut sanilliullugu arnani atugaaneruvoq: Arnat 16 procentii akipput coronamik eqqugaanissaq »ersigisorujussuugitsik«, angutillu 8 procentiinnaannut tamanna atuulluni.
Angutit 34 procentii »ersinngilluinnarput«, arnallu 17 procent ersinngilluinnarlutik.
Uissuumminanngitsumik ernumanerup ukioqqortusiartorneq ilutigalugu alliartortarnera ersarippoq. Innuttaasut 70-it sinnerlugit ukioqartut pingajorarterutaa annilaangasorujussuupput. 18-iniit 25-nut ukiullit akornanni taamaallaat 7 procentit assingusumik annilaangasorujussuupput.
Aviisimi AG-mi atuarnerusinnaavutit - aviisi uani pissarsiariuk: