Corona tuniluuttoq: Utoqqaat illuat napparsimmavillu pulaartut isersinnaanerannut killilersuisut
Covid-19-imik tuniluuttoqarnera pissutigalugu Sisimiuni nunap immikkoortuani peqqinnissaqarfimmi uninngasunut pulaartarneq taamaatikkallarneqarpoq, Kangaatsiami utoqqaat illuanni aamma pulaartunut killilersuisoqarpoq.
Sisimiuni napparsimmaviup ataasinngornermi 18. juli ingerlaannaq atuutilertumik uninngasunut pulaartoqartarnera taamaatikkallarpaa, Covid-19-imik tunillatsittoqarsimasoq paasineqarmat.
Tuniluuttoqarnera pissutigalugu Kangaatsiami utoqqaat illuata ilaquttat pulaarsinnaanerannik killilersuisoqalerpoq. Ilaqutaasut tassani pulaarnissamut periarfissaqarput, kisianni pulaarnissaq siusinaarluni nalunaarutigineqartassaaq, pulaarnermilu qanermut assiaquteqartoqartassalluni.
Nakorsaaneqarfik suliffeqarfinni tuniluuttoqartillugu nalunaarfigineqartarunnaarsimasoq, Nunatta Nakorsaaneqarfiani nakorsaq ilinniartitsisoq, Paneeraq Noahsen, Sermitsiaq.AG-mut taama ilisimatitsivoq. Napparsimmaviit uninngasumik Covid-19-imik tunillatsittoqarsimatillugu taamaallaat ilisimatitsisussaapput.
Piffissami matumani nuna tamakkerlugu killilersuuteqanngilaq, suliffeqarfiillu tuniluuttoqarnerani qanoq iliuuseqassanerlutik namminneq aalajangiisussaapput.
- Suliffeqarfiit napparsimmaviillu piffissami matumani namminneq upalungaarsimanermut pilersaaruteqarput, Paneeraq Noahsen nassuiaavoq.
Killilersuinissamut pilersaaruteqartoqanngilaq
Ukiaanerani ukiuuneranilu Covid-19-imik annertuumik tuniluuttoqalernissaa naatsorsuutigineqartoq, nakorsaaneq qaammatip aallartinnerani nalunaarutigaa.
Omikronip allannguutai nutaat tuniluutianerupput, tunillatsittulli napparsimaruluttanngillat. Innuttaasut 50-it sinnerlugit ukiullit inuillu timiminni akiuussutissaminnik sanngiinnerusut ukiaru Covid-19-imut akiuussuserneqarnissamik neqeroorfigineqassapput.
Piffissami matumani nakorsaaneqarfik tuniluunnermik pinaveersaartitsiniarluni killilersuutinik oqartussanut innersuussuteqarnissamik pilersaaruteqanngilaq.
- Ukiaru aamma ukioru inuiaqatigiinni tuniluunnerup annikillisinnissaannut iliuusissanik Naalakkersuisunut inassuteqarnissarput pisariaqalernavianngitsoq naatsorsuutigaarput. Allannguut atugaanerusoq tuniluutiavoq, inunnulli peqqittunut uloriananngilaq, nakorsaaneqarfimmi nakorsaq Paneeraq Noahsen oqarpoq.
- Napparsimanermut aamma toqusoqartarneranut tunngatillugu pissutsit malinnaaffigaarput, kiisalu allannguutit nakkutigalugit. Piffissami matumani kingusinnerusukkut Naalakkersuisunut killilersuutinik inassuteqarnissatta pisariaqalersinnaanera oqaatigisinnaanngilara, Paneeraq Noahsen oqarpoq.