Corona Tele-Postimut ilinniutaasimasoq
Corona nunarsuarmi tuniluummat Tele-Post allatut aaqqiissutissarsiortariaqartarsimavoq, suliffeqarfiup siunissami iluaqutigisinnaasaanik.
”Sunaluunniit ima ajortiginngilaq arlaannut iluaqutaasinnaanani”
Oqariartaatsip tamatuma Tele-Postip ukiumi coronaqarfiusumi ilikkagaqarsimanera erseqqissumik takutippaa, tassami suliffeqarfiup ingerlataasa ilaat coronap tuniluunneranit ajornartorsiortinneqarsimapput, killilersuutilli sukannersut atuunneranni aaqqiissutissanik nutaanik nassaarniartoqartariaqarsimammat aningaasarpassuarnik sipaaruteqartoqarsimavoq.
- Angalanissamut killilersuutit aningaasarpassuarnik sipaaruteqartissimavaatigut. Siusinnerusukkut ajornartorsiuteqaraangatta nutaamilluunniit suliassaqaraangatta immikkut ilisimasalinnik siunnersortinilluunniit Nuummukartitsisarpugut, aap taamaalilluta paasisimavarput internetsi aqqutigalugu ataatsimeeqateqarnikkut sorpassuartigut nammineq iliuuseqarsinnaalluta, Tele-Postimi pisortaaneq Kristian Reinert Davidsen Sermitsiaq.AG-mut oqarpoq.
Piginnaasat ilisimaneqanngitsut
- Nunami allamiup immikkut ilisimasallip ungasissorsuarmit ikiormatigut piffissamik, timmisartumut bilitsimik akunnittarfimmullu aningaasartuutinik qanoq sipaagaqartigisinnaasimanerput takorluulaariaruk. Suliassamut siornatigut ullorpassuit atortarsimallutigit maannakkut nalunaaquttap akunnialuinnaani atorsimavavut. Teknologimik qaffasilluinnartumik immikkut ittumik ingerlataqarnitsinni tamanna annikitsuinnaanngilaq, pisortaaneq nassuiaavoq.
Kristian Reinert Davidsenittaaq ilisimanngisaminik sulisumi piginnaasaqarnerat coronap nunarsuarmi tuniluunnerani saqqummertut tupaallaatigisimavai.
Pisortaanerup assersuutigalugu it-kkut atortorissaarutissap nutaap Aasianni sinerissami radiokkut attaveqaammut 2020-mi atassuserneqarnera, misilerarneqarnera atuutsinneqalerneralu oqaluttuaraa.
- Østgrigimiut sanaavata atassuserneqarnissaa pineqarpoq. Nuna taanna taamanikkut coronamit eqqugaasimaqaaq, taamaammallu immikkut ilisimasalittatik suliassamik isumaginnikkiartortillugit aallartissinnaasimanngilaat. Aallartitsisarnerammi nalinginnaasuugaluarpoq. Suliassarlu isumagineqartussaalluni. Tuniluuttoqarunnaarnissaa utaqqisinnaasimanngilarput, Kristian Reinert Davidsen nassuiaavoq, nangillunilu:
- Immikkut ilisimasallit Østrigemeersut internetsikkut ataatsimeeqatigaluta suliassanik tamanik isumaginninnitsinni ilitsersorluta ikiorsinnaagaatigut paasinarsivoq. Aap, sulisutta takutippaa suliassamik isumaginnissinnaallutik aamma pisariaqartinneqartunik piginnaasaqarlutik, pisortaaneq oqarpoq.
Pingaarutilimmik ilikkagaqarneq
Kristian Reinert Davidsenip isertuutinngilaa, sulisumi suliffeqarfiullu pissutsinit tatisimaneqarnermi iliuuseqarsinnaanerannut tupallassimanini.
- Coronap nunarsuarmi tuniluunnerata pingaarutilimmik ilikkagaqartippaatigut. Sulisuvut assersuutigalugu pikkorissarnissat ataatsimeersuarnissallu pineqartillugit soorunami angalasaqqilissapput. Pingaaruteqarporli, corona nunarsuarmi neriuutiginartumik qanittukkut tuniluukkunnaassappat, ilikkarsimasatta puigorneqannginnissaatl, pisortaaneq erseqqissaavoq.