Corona pissutigalugu akiligassaq: Minnerpaamik 218 million koruunit – maannamut
Aningaasaqarnermut naalakkersuisoqarfimmit mianersortunnguamik naatsorsuusiarisat ersersippaat maannamut nunatta karsianut coronap ajornartoortitsinera qanoq aningaasartuutaatiginera, tassani ererpoq maannamut 218 million koruunit coronamut atorneqareersimasut, taamaattorli ukioq mannamut tunngatillugu akiligassap annertussusia aatsaat aappaagu tamakkiisumik takuneqarsinnaavoq.
Upernalernerani coronap ajornartoortitsinera aallartimmalli inuiaqatigiit kalaallit, nunani allanisulli allatut iliorsinnaannginnerup aqqani ajornartoornermut naleqqussapallattariaqarsimapput, corona nunamut takkutsaaliorlugu sukannersorujussuarnik malittarisassaliortoqartarpoq aammalu minnerunngitsumik allatut iliorsinnaanani nunap aningaasaqarnera ajornartoornermut akiuussinnaanngorsarneqarluni. Tassami pisut allanngoraannavipput aammalu tamanna pissutaalluni aningaasartuutaanerusussanik pisoqaqattaaginnavippoq, Naalakkersuisullu tamaviaartinneqarput matussisiisinnaanissaq qulakkeerniarsaralugu.
Aallaqqaammulli nunatta karsiata aningaasanik imaqarluarnera, aammalu nunatta aningaasaqarnikkut patajaatsumik ingerlanneqarnera pissutaalluni, manna tikillugu aningaasaqarnikkut aqunneqarsinnaanngitsumik corona artukkiinngilaq. Taamaattorli aamma nunatta karsiata akiliisinnaassusaata qulakkeersimaneqarnissaa siunertaralugu Naalakkersuisut ilimasaarereerput taarsigassarsiniartoqartariaqassasoq, taamaattorli ukioq mannamuunngitsoq, siunissarli ungasinnerusoq eqqarsaatigalugu, tassami ilisimaneqanngilaq coronap ajornartoortitsinera qanoq sivisutigissanersoq aammalu akiligassartaa qanoq annertugiumaarnersoq.
Immikkut aningaasartuutit
Manna tikillugu coronap ajornartoortitsinera pissutaalluni immikkut ittumik naatsorsuutigereerneqarsinnaanngitsumillu aningaasartuutaasimasut 177 millioner koruunit qaqisimalerpaat.
Aallaqqaammulli peqqinnissaqarfik qummut killiligaanngitsumik aningaasartorsinnaasoq nalunaarutigineqarnikuuvoq, peqqinnissaqarfik sipaarniarfigineqassanngitsoq, aammalu sulisussanik atortussanillu pisariaqartinneqartunik pissarsiniarsinnaasoq tassani siunertarineqarluni.
Maannamulli peqqinnissaqarfiup aningaasartuutiginerusaasa ersersippaat peqqinnissaqarfik coronap ajornartoortitsineranut naleqqussarsinnaasimasoq aningaasartuutaanertaqarpallaanngitsumik, tassunga aamma pissutaaqataalluinnartut ilagivaat inuiaqatigiit kalaallit sukkasoorujussuarmik paasimmassuk coronap ajornartoortitsinera qanoq ilungersunartiginersoq taamaammallu oqartussaasut innersuussutaannut maleqqusaannullu naapertuuttumik iliuuseqartarsimammata peqqinnissaqarfik maannamut innarlerneqarpallaarani ingerlasinnaasimasoq.
Coronavirusip ajornartoortitsinera nunatta aningaasaqarneranut qanoq sunniuteqassanersoq pillugu naatsorsuutaagallartut pillugit aviisimi Sermitsiami atuarnerusinnaavutit. Aviisi uani pissarsiariuk: