Corona pillugu ualeru tallimanut nutaarsiassaqartoqassasoq

Namminersorlutik Oqartussat ualimut tallimanut tusagassiortunik assersaasimapput, tassa coronap killiffia Nuummilu killilersuilersimanerit pillugit nutaarsiassiisoqassalluni.

Taamak kingusitsigisumik tusagassiortunik katersortitsiniarnermut pissutaavoq, susoqarnissaanik nalunaaruteqartoqartinnagu oqartussat kingullertigut misissuisoqarneranit paasissutissanik pissarseqqaarusunnerat.

Nuummi tallimanngormalli killilersuisoqalerpoq, tassani pisiniarfinni kikkullu tamarmik iserfigisartagaanni qanermut assiaquteqarnissq, neriniartarfiit timersortarfiillu matoqqatinneqarnissaat piumasaqaataavoq, aamma illoqarfimmiit aallarnissaq inerteqqutaalluni.

Ullumi tusagassiortunik katersortitsinermi paaserusunneqarsinnaasoq alla tassaavoq, Danmarkimiit sapaatip akunneranut qassit tikittalissanersut.

Maannamut amerlanerpaamik 600-t tikissinnaatitaapput, nalunaarummili nutaami maajip 21-aneersumi allassimavoq: Coronamut atatillugu allattoqarfiup sapaatip akunneranut qanoq amerlatigisut tikissinnaassanersut Air Greenlandimut nalunaarutigissagaa.

Sapaatip akunnera manna aallarnerfigalugu qassit tikissinnaassanersut akissutissarsiniarnera ajornarsimavoq.