Skip to main content

Corona pillugu sulisoqatigiit: Aasianni tuniluuttoqalinnginnera qujanaqaaq

Aasianni mattusimanissamut malittarisassanik malinnissimanngitsumik kingullermik tunillatsittoqarsimasoq paasineqarmat quarsaartoqareersoq, corona pillugu sulisoqatigiit erseqqissaatigaat, Aasianni amerlanerusunik tunillatsittoqarsimanngimmat iluatsitsingaatsiarsimasugut.

Oktobarip 21-ani Aasiaani tunillatsittoqarsimasoq paasineqarpoq, pineqartorlu mattusimanissamut malittarisassanik malinnissimanngitsoq paasineqarluni. Tunillatsissimasoq ullut tallimat qaaniunneranni misissorteqqinnginnermini pulaartoqartarlunilu inuit allat akornanniittarsimavoq. Tamanna ajorluinnartumik kinguneqarsimasinnaagaluartoq, corona pillugu sulisoqatigiit erseqqissaatigaat.

- Innersuussutigineqartut malinneqarnissaat pingaaruteqarluinnarpoq. Aasianni allat tunillatsissimannginnerat iluatsitsineruvoq, corona pillugu sulisoqatigiit siulittaasuat Hans-Peder Barlach Christensen Sermitsiaq.AG-mut oqarpoq.

Nunatsinni nakorsaanerup Henrik L. Hansenip erseqqisaatigaa, nunami maani suli kiffaanngissuseqarnerput nuannaarutigissagipput aamma kiffaanngissuseqarnerput attatiinnarniarlugu tamatta immikkut akisussaaffimmik tigusissasugut.

- Nunami maani ajunngilluinnartumik ingerlavugut. Nunarsuarmi kiffaanngissuseqarnerpaanut ilaagunarpugut, tamannalu attatiinnarusupparput. Inuiaqatigiiusugut kiffaanngissuseqarnitta naleqassusaa paasinerlunneqassanngilaq, nunatsinni nakorsaaneq oqarpoq.

Aasianni tunillatsissimasup mattusimanissamut malittarisassanik malinnissimannginnera arlalinnik kinguneqarsimavoq.

Sisimiuni KTI-mi atuartut 80-it angerlartinneqarsimapput, illoqarfimmilu inuit qulit tunillatsissimasumik attaveqarsimasut angerlarsimaffimminni mattusimatinneqarlutik.

Aamma Nuummi tuniluuttoqalersinnaanera pinngitsoortinniarlugu iliuuseqartoqarpoq. Inatsisartut Aningaasaqarnermut Ataatsimiititaliaani ilaasortat angerlarsimaffimminni mattusimatinneqarput, tunillatsissimasumut qaninigsaasoq ataatsimiititaliap ataatsimiinneranut peqataasimanera pissutigalugu.

Qanoq tunillaasinnaatigineq assigiinngitsoq

Qujanartumilli nunatsinni nakorsaanrup novembarip aappaani ilisimatitsissutigisinnaasimavaa, inuit tunillatsissimasinnaasut tamarmik misissortikkamik tunnillatsissimanngitsut.

Nunatsinni nakorsaanerup oqaluttuaraa, tunillatsissimasup allanik tunillaasannginnera qaqutigoortuusoq.

- Qanoq tunillaasinnaatigineq assigiinngitsupilussuuvoq, taamaammat iluatsitsisimaqaagut Aasianni "tuniluutsitsingaatsiarsinnaasumik" inoqanngimmat, taanna oqarpoq.

Corona pillugu sulisoqatigiit erseqqissaatigaa, malittarisassanik malinninnissamut nunamilu tuniluuttoqalinnginnissaanut nammineq inuttut akisussaaffeqarnerup pingaaruteqarnera.

Maannakkorpiaq malittarisassanik sukaterinaveersaartoqarpoq, tamatumunngali taarsiullugu innersuussutinik malittarisassanillu kikkut tamarmik malinninnissaat kaammattuutigineqarluni.

Tamatuma saniatigut corona pillugu sulisoqatigiinnit kaammattuutigineqarpoq, nunamiit aallarnissaq sapinngisamik pinaveersaarneqassasoq, tassa uteraanni tuniluutsitsilersinnaaneq pinaveersaarniarlugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER