Corona pillugu sulisoqatigiit kaammattuipput: Tikinnermi kisimiillutit angerlarsimagallarit

Tikinnermi inoqutigiit peqatiginagit kisimiilluni angerlarsimaannarnissaq, corona pillugu sulisoqatigiinnit kaammattuutigineqarpoq.

Kalaallit Nunaat coronavirusimik tunillaassorfiuleratarnissamut juullip nalaani aarlerinartorsiungaatsiassaaq. Juullip ukiutoqqallu akornanni Kalaallit Nunaannukarlutik tikittussat 3.000-it missaat nalunaarsorneqarsimapput.

Tikittussat amerlanerpaartaat juullinnginnerani tikissapput ukiortaareerpallu aallaqqissallutik.

Naalakkersuisut angalasunut maanna kaammattuipput tikittut tikinnerminni kisimiillutik angerlarsimaannarallaqqullugit, inoqutigiit angalasimanngitsut tunillatseratarsinnaanerat annikinnerpaamiitikkumallugu.

- Juullip ukiutoqqallu akornanni tikittussat amerlassusaat ernumanartoqartipparput. Angalanissap allanngortinnissaanut sapaatip akunnerata siuliani kaammattuuteqareernitsinnit angalanissaminnik allanngortitsisut arlaqaalupput. Sulili tikittussat amerlallutik, Anna Wangenheim oqarpoq.

Corona pillugu sulisoqatigiit kaammattuipput:

  • Tikinnermi angerlarsimaannassaatit
  • Angerlarsimaannarnermi inoqutigiit angalasimanngitsut qanillineqassanngillat
  • Tunillatsissimannginnerit uppernarsarneqartinnagu katersuunnernut peqataassanngilatit - unioqqutitsinerit akiliisussanngortitsinermik kinguneqassapput

Corona pillugu sulisoqatigiit ilisimatitsipput:

  • Malunniuteqannginneq COVID-19-imik tunillatsissimannginnermik isumaqanngilaq.
  • Malunniuteqannginneq allanut tunillaasinnaannginnermik isumaqanngilaq.
  • Aamma juullilernera tunillaasinnaannginnerup annikinnerulerneranik atuutinnginneranilluunniit isumaqanngilaq.

Killilersuinissamut inatsisitigut tunngavissaqanngilaq

Peqqissutsimut Naalakkersuisoq, Anna Wangenheim nassuiaavoq juullip ukiortaallu nalaani angalanissanut piumasaqaatit killilersuinissallu periarfissaasinnaasut Naalakkersuisunit misissorneqarsimasut.

- Nappaatit tunillaassortut akiorniarlugit iliuutsit pillugit inatsimmi tunngavissaqarsimanngilagut annertunerusunik killilersuilissalluta, nunap iluani tunillaassortoqanngimmat, Anna Wangenheim ilisimatitsivoq.

Corona pillugu sulisoqatigiit maanna kaammattuipput tikittut mianersornerpaaqqullugit, maleruaqqusanillu malinneqqullugit.

- Inoqutigiinni tikittoq qanillinaveersaarluni angerlarsimaannarsinnaanngippat, taava kommunip angerlarsimaannarallarnermi inissiffissamik isumaginnittuussaaq, Anna Wangenheim oqarpoq.

Juullereerpat misissorteqqissinnaapput

Nakorsaaneq Henrik L. Hansen ilisimatitsivoq, 19. december sioqqullugu tikittut juulliarartinnagu ullut tallimassaanni misissorteqqissinnaasut.

- Ulloq taanna qaangiutereertoq tikittut juullikkunni angerlarsimaannaqquneqarput, allanullu qanilleqquneqaratik. Juullip ukiutoqqallu akornanni ulluinnarni misissorteqqinnissamut periarfissaqarumaarpoq.

Juullip ukiutoqqallu akornanni tikittut ukiortaareernerani ullormi 2. januar 2021-mi aatsaat misissorteqqissinnaajumaarput.

Powered by Labrador CMS