Corona pillugu nittartagaq nutaaq
Coronavirus pillugu nunatsinni killiffik paasisaqarfiginiaraanni, nittartagaq nutaaq iserfigineqariaannanngorpoq. Corona pillugu allattoqarfik taama ilisimatitsivoq.
Nunatsinni coronavirus pillugu killiffik paasisaqarfiginiarukku sumukassavit?
Kalaallit Nunaanni innuttaasut coronavirus pillugu killiffik nutaanerpaaq paasisaqarfiginissaanut ajornannginnerutikkumallugu, corona pillugu allattoqarfik nutaamik nittartakkamik pilersitsivoq.
Innuttaasut qassit siullermeerlutik aamma aappassaaneerlutik kapitissimanersut, qassit tunillatsissimanersut qassillu maannakkorpiaq tunillatsissimanersut kiisalu malittarisassat maanna atuuttut pillugit nittartagaq imaqassaaq.
Nittartagaq tassaavoq corona.nun.gl.
Paasissutissat amerlanerusut
Nittartakkap suliarinerani paasissutissat amerlanerusut ataatsimoortittussanngorlugit katersorneqarsimapput, soorlu aamma atuisunut atoruminartussanngorlugu suliaalluni, corona pillugu allattoqarfik ilisimatitsivoq.
- Nittartakkami Kalaallit Nunaanni coronavirus pillugu paasissutissat, katersuunnissamut angalanermut nalunaarutit kingulliit, angerlarsimaannarnissamut maleruaqqusat kapuinermut killiffiit kiisalu paasissutissat allat pisinnaavatit, corona pillugu allattoqarfik tusagassiorfinnut nalunaaruteqarluni allappoq.
Suliniummi oqartussat coronavirus pillugu nalunaarutaat ataatsimoortinneqalerput. Nittartagaq ullumimiit ammarneqarsinnaalereerpoq.