Corona pillugu kisitsisit: Kujataani coronartumik suli toqusoqanngilaq
Nun.gl-imi kisitsisit kukkusut ulluni arlaqatuni takutinneqarput. Coronartut katillugit pingasut toqusimasut kisitsisit takutippai. Nunatta nakorsaanerata kukkunerusoq paasissutissiissutigaa, coronarlutik toqusut marluusut eqqortuusoq oqaatigalugu.
Tunillatsissimasunik nalunaarsuinerni nun.gl-imi arfininngornermi saqqummiunneqartumi Kujataani ataatsimik coronartumik toqusoqarsimasoq allassimavoq. Tamannalu kujataani innuttaasunit arlaqartunit ernumaammersitsivoq.
Kujallermi arfininngormat tunillatsittut nutaat 126-iupput Qaqortumilu covid-19-imik tunillatsissimaneq pissutigalugu napparsimmavimmut innartinneqartoq ataasiusoq paasissutissiissutigineqarpoq. Kisitsisit assitaa nittartakkakkut attaveqatigiiffimmi siaruarneqarpoq innuttaasullu arlallit tuniluunnerup mianersuunneqarnissaa erseqqissaatigalugu.
Nunatta nakorsaaneqarfiata kisitsisit marlunngornerup ullaap tungaanni iluarsivai erseqqissaatigalugulu coronartut marluk toqunikuusut. Ataaseq Avannaata Kommunianiippoq ataaserlu Kommuneqarfik Sermersuumi.
