Skip to main content

Corona pillugu iliuuserineqartut 145 mio. koruuninik akeqarsimasut

Coronap tuniluunnera 2021-mi miliuuninik pingasunik kisitsisitalinnik aningaasartuutaasimavoq, akiligassallu qanoq annertutigineri suli naatsorsorneqarsimanngillat.

Namminersorlutik Oqartussat coronap tuniluunneranut iliuuseqarnerminnut aningaasarpassuit atorsimavaat. Naalakkersuisup Mimi Karlsenip politikkerip Anna Wangenheimip (D) apeqqutaanut akissuteqarnermini ilisimatitsissutigaa, corona pillugu iliuuserineqarsimasunut kontomi ukioq manna januaarip arfineq-aappaat tikillugu 145,5 millioner koruuninik aningaasartuuteqartoqarsimasoq.

Ukiumilu matumani februaarip arfineq-aappaat tikillugu aningaasartuutaasimasunik kontomut suli ikkussuisoqarsinnaammat akiligassat suli annertunerusinnaapput

Aningaasarpassuillu atorneqarsimagaluartut, 2020-mi aningaasartuutaasimasunut tamarmiusunut sanilliullugu affaasa missaanniillutik. 2020-mimi coronamut atatillugu immikkut ittumik iliuuserineqarsimasunut katillugit 314,8 millioner koruunit atorneqarsimagamik, naalakkersuisoq ilisimatitsivoq.

Kalaallit Nunaanni Naatsorsueqqissaartarfiup 2020-mi nunami aningaasartuutaasimasunik naatsorsuisimanerani aningaasat sumut atorneqarsimanera pillugu allassimasoqalaarpoq.

Assartuineq, allaffissorneq illersuutillu

2020-mut nunamut naatsorsuutit decembarip qaammataani saqqummiunneqarput, tassanilu Naatsorsueqqissaartarfiup aningaasat annertunerulaartutut taasimavai, tassa 2020-mi covid-19 tunngavigalugu immikkut ittumik iliuuserineqarsimasunut peqqinnissaqarfimmik aningaarsartuutaasimasut 322 millioner koruuninut qaffasimmapput.

Naatsorsueqqissaartarfik naapertorlugu, aningaasat ilaatigut Kalaallit Nunaanni innuttaasut misissorneqarnerannut, napparsimasunik assartuinermut, Coronamut atatillugu allattoqarfiup ingerlanneqarneranut kiisalu peqqinnissaqarfimmut illersuutissanut il.il. atorneqarsimapput.

Anna Wangenheimip coronamut atatillugu immikkut ittumik iliuuserineqarsimasunut aningaasartuutit saniatigut aamma apeqqutigisimavaa, misissortinneq ataaseq qanoq akeqarsimanersoq.

Vatsiusaq tigusinermi atorneqartartoq aamma igalaamineq ikisiffissaq 18,24 koruuneqartut

Naalakkersuisoq akivoq, PCR atorlugu misissuinerit akii tuniluuttoqarnerata nalaani nikerarsimasut, PCR-ili atorlugu misissuineq ataaseq maannakkorpiaq 18,24 koruuneqartoq. 

Akigitinneqartorli taanna taamaallaat vatsiusamut igalaaminermullu tunngassuteqarpoq. Tamatumami saniatigut misissueqqissaarnernut, sulisunut, illersuutinut il.il.  aningaasartuuteqartoqarsimalluni.

Naalakkersuisup ilanngullugu oqaluttuaraa, 2020-mi innuttaasut angerlarsimaffimmi avataani mattusimasariaqarsimasut najugaqarfigisaannut 1.065.314 koruunit atorneqarsimasut.

2021-mi siunertamut tassunga 6,2 millioner koruunit atorneqarsimapput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER