Skip to main content

Corona pillugu ikiorsiissutit nutaat: Angalaninni akikillisaaffigineqarit

Naalakkersuisut angalanissamut ikiorsiissutit, Kalaallit Nunaanni angalanermi akikillisaassutaasinnaasut atuutsilersimavaat.

Nunami maani piffissaq takornariarfiunerpaasartoq aasaaneranilu sulinngiffeqarfiusartoq sukkasuumik qaangiukkiartoraluartut, Naalakkersuisut takornariartitsisartunut aningaasatigut ilungersunartorsiortunut ikiorsiissutinik allanik atuutsitsilersimapput.

Ikiorsiissutit nutaat ataasinngormat atuutsinneqalerput, tassaasut "angalanissamut ikiorsiissutit", siunertarineqarluni Kalaallit Nunaanni angalanerup akikinnerulernissaa.

- Taamaasilluni ikiorsiissuteqarnerup kingunerissavaa Kalaallit Nunaanni illoqarfinni nunaqarfinnilu angallannerup iluani Namminersorlutik Oqartussat tapiissuteqarneratigut COVID-19-imut akikillisaasoqarsinnaanissaa.

- Nunatsinni angalasut maanna periarfissarilissavaat angalatitsisut ataasiakkaat aqqutigalugit COVID-19-imut akikillisaqarnersoq, Naalakkersuisut tusagassiorfinnut nalunaaruteqarnermi allapput.

Kalaallit Nunaanni takornariartitsinermik ingerlataqartut aaqqissuussamik atuisinnaasut

Aaqqissuussq Kalaallit Nunaanni innuttaasunut atugassiaasoq nalunaarummi allassimavoq, angalasulli qanoq annertutigisumik takornariartitsisartunit akikillisaaffigineqarsinnaanerat imaluunniit ikiorsiissummut aningaasat qanoq annertugisut atugassiaanersut allassimanngilaq.

Takuneqarsinnaavorli Kalaallit Nunaanni takornarianik angallassisartut, soorlu Arctic Umiaq Line, Disko Line, Maniitsoq Tour Boats, Nuuk Water Taxi aamma Air Greenland, angallassinerminni tapiiffigineqarnissaq pillugu Naalakkersuisunik isumaqatigiissuteqarsinnaasut.

Takornariartitsinermik ingerlataqartartut ataasiakkaat tapiissutit aqqutigalugit akikillisaasinnaassapput, aaqqissuussarlu ukioq manna septemberip qaammataata naaneranut atuutissalluni. Taamaalilluni aaqqissuussaq qaammatit marluk sinnilaarlugit atuuttussaavoq.

Arlallit aaqqissuussamik atuinissaat neriuutaasoq

Inuussutissarsiornermut Aatsitassanullu Naalakkersuisup Jens-Frederik Nielsenip ilisimatitsissutigaa, Naalakkersuisut isumaqartut takornariartitsinermik ingerlataqartut annertunerusumik ikiorserneqarnissamik pisariaqartitsisut:

- Taamaattumik nuannaarutigaara ullumikkumiit aallartittumik illoqarfiit nunaqarfiillu akornanni angalanernut tapiissuteqarsinnaalernerput. Neriuppunga periarfissiinerput atorluarlugu innuttaasut nunatsinni piffiit kusanaqisut tikissimanngisatik alakkartissagaat, Jens-Frederik Nielsen oqarpoq.

Sulisartut kattuffiini siulittaasut naammagisimaarinnittut

Ikiorsiissutissat inuussutissarsiutillit suleqatigalugit isumaqatigiissutigineqarsimavoq, Sulitsisiut siulittaasuaq Birna Buus Pedersern, SIK-mi siuittaasoq Jess G. Berthelsen aamma Nusukami siulittaasoq Gerth Lynge tassunga atatillugu oqarput:

- Coronap ajornartoortitsinera naatsorsuutigineqartuniit annertunerusunik arlaqarnerusunik kingunerlutsitsivoq. Inuussutissarsiortuniit nalunaarutaasartut takutippaat takornariartitsinermik ingerlataqartut aasaq manna annertuumik eqqugaasut. Taamaattumik takornariaqarnerup iluani iluaqutaasinnaasumik Naalakkersuisut suleqatigalutigit aaqqissuussineq nutaaq pilersissinnaagatsigu nuannaarutigaarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER