Corona-passi Kalaallit Nunaanni atuutsinneqassanersoq nalunartoq
Danmarkimi aningaasaqarnermut ministeeriaqarfimmit erseqqissumik oqaatigineqarsinnaanngilaq, corona-passi naalagaaffeqatigiinnit tamani innuttaasunut atuutsinneqassanersoq, Sermitsiaq.AG-mut tamanna ilisimatitsissutigineqarpoq.
Danmarkimi peqqissutsimut oqartussat corona-passi "nunanut allanut angalanermut atatillugu Covid-19-imut akiuussutissalertissimanermut uppernarsaatitut piffissap sivikitsup iluani atorneqarsinnaasoq" ineriartortillugu suliarivaat, Aningaasaqarnermut Ministeeriaqarfik mailikkut Sermitsiaq.AG-.mt oqaaseqarpoq, nangillunilu allalluni:
- Aaqqiissutissaq tamanna pingaartumik suliffimmut atatillugu angalanernut atugassiaavoq, innuttaasunullu piumasaqaataavoq Danmarkimi CPR-normoqarnissaq NemID-eqarnissarlu kiisalu Det Danske Vaccinationsregisterimi nalunaarsorneqarsimanissaq.
Qulaajagassaqartoq
Kalaallilli Nunaanni suliffeqarfiit avammut tunisaqartartut inuussutissarsiutillillu allat nunani allani suliffimminnut atatillugu ataatsimiigiarniartut danskit suliniutaannut qilanaarpallaassanngillat, Aningaasaqarnermut Ministeeriaqarfiup akissuteqaataani atuarneqarsinnaavoq.
- Aaqqiissutissanut tigussaasunut atatillugit arlalinnik maannakkorpiaq qulaajagassaqarpoq, taakkununnga ilaalluni tassannga atuinissamut peqqinnissatigut ilisimasalinnit nalilersuinissaq, assersuutigalugu akiuussutissalertissimagaluarluni suli tunillaassuisoqarsinnaanersoq. Aamma aaqqiissutiginiakkap teknikkikkut ilusilersorneqarnissaa pillugu qulaajaasoqartussaavoq, tassunga ilanngullugu corona-passi naalagaaffeqatigiinni tamani atorneqarsinnaanersoq, mailikkut ilisimatitsissutigineqarpoq, tassanilu aamma erseqqissaatigineqarpoq, aaqqiissutiginiakkap naalagaaffeqatigiinnut tamanut atuutsinneqarsinnaaerata eqqarsaatigineqarnera.
Aningaasaqarnermut Ministeeriaqarfiup ilanngullugu ilisimatitsissutigaa, corona-passip angalanermi siunertanuinnaq pinnani allanut aamma qanoq atorneqarsinnaanera Danmarkimi naalakkersuisut kingusinnerusukkut aatsaat inaarutaamik isummerfiginiaraat.
Corona-passi qaammatit pingasut sisamallu qaangiunneranni piareersimanissaa naatsorsuutigineqarpoq.
Sulisitsisut: Pisariaqartipparput
Kalaallit Nunaanni Sulisitsisut pisortaata Christian Keldsenip aaqqiissutissap Kalaallit Nunaanni innuttaasunut akiuussutissalertissimasunut atuutsinneqarnissaa kissaatigaa.
- Akiuussutissalertissimanermut-passi Kalaallit Nunaata avammut ammarneqarnissaanut periarfissaasutut isigivara, tassunga ilanngullugu uagut nammineq nunanut allanut angalasinnaanitsinnut, niuernermut qasuersaarnissamulluunniit atatillugu. Qularutigineqassanngilaq ilaasortatta suliffeqarfiutitik isumaginiarlugit nunanut allanut killeqanngitsumik angalasarnissartik pisariaqartimmassuk, Sulisitsisut pisortaat Sermitsiaq.AG-mut oqarpoq.