Corona nunatsinniilermalli: Dronning Ingridip Napparsimavissuani uninngasoqanngilaq
Ullumikkut marsip aallaqqaataani Covid-19-eqarlutik uninngasut arfineq-marluupput. Nuna tamakkerlugu Covid-19-eqarlutik uninngasimasut katillugit 172-iupput, taakkunannga meeqqat 18-it inorlugit ukiullit 13-it napparsimavimmi uninngasimapput. Taama nunatta nakorsaaneqarfia corona pillugu ullormut paasissutissiinermini allappoq.
Ullup ataatsip ingerlanerani PCR-testit 58-it misissorneqarput, taakkunannga tunillatsissimasut 21 procentiupput. Corona nunatsinni tuniluutsilermalli Covid-19-eqarlutik uninngasut katillugit 172-iupput.
- Ullumi marlunngornermi februaarip 28-iani tunillatsissimasut arfineq-marluk napparsimavinni uninngapput. Maniitsumi pingasut, Ilulissani marluk, Sisimiuni ataaseq Nanortalimmilu ataaseq. Taamaasilluni ukioq manna siullerpaamik Covid-19-eqartumik Dronning Ingridip Napparsimavissuani uninngasoqanngilaq aamma Peqqinnissaqarfinni Sermersuumiittuni allani. Peqqinnissaqarfik Diskomi tunillatsissimasunik aamma uninngasoqanngilaq, nunatta nakorsaaneqarfia nittartakkamini taama paasissutissiivoq.
Meeqqat 13-it unitsinneqarsimasut
Uninngasimasut akornanni 54 procentit arnaapput, uninngasunilu 172-iusuni agguaqatigiisillugit ukioritinneqartoq tassaavoq 52,2. Meeqqat 18-it inorlugit ukiullit covid-19-eqarlutik uninngasut katillugit 13-iupput. Covid-19-eqarlutillu uninngasut angajullersat marluupput, taakkua 96-inik ukioqarlutik.
- Covid-19-imik imaluunniit covid-19-eqarlutik toqusut katillugit 18-iupput. Toqusut affaani Covid-19 pingaarnertut toqqutaavoq. Toqusut akornanni agguaqatigiisillugit ukioritinneqartoq, tassaavoq 79,6. Taakkunannga nukarliusimavoq 66-inik ukiulik angajulliullunilu 92-inik ukiulik, nunatta nakorsaaneqarfia allappoq.
Ullup ataatsip ingerlanerani unittut nutaat pingasuupput, pingasullu angerlartinneqarsimallutik. Nuummi marluk angerlartinneqarput Ilulissanilu ataaseq.
- Covid-19-eqarlutik uninngasut akornanni 37 procentit pingaarnertut Covid-19 unissutigaat (Kategori 1). Uninngasuni 172-iusuni 92-it Nuummi uninngapput, Sisimiuni 20-t, Ilulissani aqqanillit, Qaqortumi qulingiluat, Aasianni qulingiluat, Upernavimmi arfinillit, Maniitsumi arfinillit, Uummannami tallimat, Nanortalimmi tallimat, Paamiuni tallimat, Narsami pingasut Qasigiannguinilu ataaseq. Taama nunatta nakorsaaneqarfia ullormut corona pillugu paasissutissiinermini allappoq.