Skip to main content

Corona innuttaasunit akiorniarneqassaaq

Nunatsinni Nakorsaanerup neriuutigaa, Kalaallit Nunaanni tuniluuttoqalersinnaanerata pinngitsoortinniarneqarnerani, nunamut tikinnermi malittarisassat atuutsinneqaqqilerneri innuttaasunit paasineqarlunilu akisussaaqataaffigineqassasut.

Ullumi tusagassiortunik katersortitsinermi Nunatsinni Nakorsaanerup Peqqissutsimullu Naalakkersuisup erseqqissaatigaat, corona nunami maani atuutilissanngippat, kikkut tamarmik akisussaataasariaqartut.

- Nunarsuarmi tamarmi coronavirusimik toqquteqarsimasut maannakkut én millionit sinnersimalerpaat.

Kalaallit Nunaannut tikinnermi ulluni 14-ini mattusimasarnissaq pillugu malittarisassat atuutseqqinneqalernerannut ilaatigut tunngavilersuuteqarluni Nunatsinni Nakorsaaneq Henrik L. Hansen taamatut oqarpoq.

Ullut tallimat qaangiunneranni misissorteqqissinnaasoqassaaq aamma tunillatsissimannginnermik uppernarsaat pissarsiarigaanni mattusimajunnaartoqartassaaq. Tamatumali malitsigisaanik tamatta naammagittartariaqarpugut, Nunatsinni Nakorsaaneq erseqqissaavoq.

Misissuisoqarnerusarnissaa sulissutigineqartoq

- Misissueqqittarnissaq unammillernarsinnaavoq, ilaasut sapaatip akunneranut tikittartut 800-t missaanniittarnerat pissutigalugu. Misissueqqittarnissamut maannakkorpiaq naammattunik atortussaqanngilagut. Nuummi tamanna naammassiuminaatsinneqarnerussaaq.

- Qularnarpoq kikkut tamarmik ullut tallimassaanni misissorteqqissinnaanissaat. Tamtuma paasineqarnissaa neriuutigaarput, taanna oqarpoq.

Kingullermik mattusimasarnissaq ullullu tallimat qaangiunneranni misissorteqqittarnissaq pillugu malittarisassaqarmat, tikittut 80 procentiisa missaanniittut misissorteqqittarsimapput.

Nunatsinni Nakorsaanerup erseqqissaatigaa, amerlanerit piffissap sivikitsup ingerlanerani misissorneqartarnissaat anguniarlugu peqqinnissaqarfik misissuinermi suliaqarsinnaasunik amerlisaasoq. Sineriammi aamma unammilligassaqartoqarsinnaavoq, ilaatigut misissugassatut tiguneqarsimasunik Nuummut nassiussisoqartariaqartoqartassammat.  

- Misissuinermi atortut immikkut ittut sineriammi atortakkavut naammatsillugit pisiarisinnaanngilagut, tuniluuttoqalersinnaaneranullu taakku ilaat toqqortariaqarsimavagut, tuniluuttoqalissappammi inuit misissornissaannut amerlanerusut pisariaqartissagatsigit, Nunatsinni Nakorsaaneq oqarpoq.  

Kikkut tamaasa nakkutiginianngikkaat 

Nalunaarut nutaaq malinngikkaanni kinguneqartitsisoqartassava?

Henrik L. Hansen: Inatsit inuit malittarisassanik malinninngitsut pillarneqarsinnaanerannut periarfissaqartitsivoq. Tamannali taamaallaat atorsinnaavoq, inuit tamarmik tamatumannga tapersiippata.

- Kikkut tamaasa nakkutigisinnaanngilagut imaluunniit nakkutigisussaanngilagut. Angalasut angalasunullu attuumassuteqartut piumasaqaammik malinninnissaq ataatsimoorlutik suliassaralugu ilisimaarissavaat. Inuilli piumasaqaammut akerliusumik toqqaannartumik iliuuseqarpata, tamanna kingunerluuteqarsinnaavoq, Nunatsinni Nakorsaaneq oqarpoq.

Peqqissutsimut Naalakkersuisup Anna Wangenheimip erseqqissaatigaa, innuttaasut tuniluuttoqalinnginnissaa akisussaaffigigaat.

- Innuttaasut tamarmik immitsinnut paasinissarput ikioqatigiinnissarlu akisussaaqataaffigaat. Taamaammat immitsinnut qanillinaveersaarnissamik, assatsigut eqittannginnissamik aamma kuniuisannginnissamik silaannarmullu quersortannginnissamik oqartussat inassuteqaataasa malinneqarnissaat kaammattuutigeqqissavarput.  

Eqqaamallugu angerlarsimanissaq misissortinnissarlu

- Tamakkua saniatigut pingaaruteqarpoq, ippigisaqarutta angerlarsimaannarnissarput misissortinnissarpullu. Tamatta akisussaaffimmik tigusinissarput pingaaruteqarpoq. Immitsinnut illersornissarput piinnarnagu, aammali ilaquttatta innuttaaqatittalu ulorianartorsiorsinnaasut illersorneqarnissaat pillugu, Anna Wangenheim oqarpoq.

Henrik L. Hansenip erseqqissaatigaa, malittarisassat atuunnissaat sivisusinnaasoq.

- Matuma piffissami sivisuumi atuussinnaaneranut piareersimareertariaqarpugut. Nunarsuarmut qiviariarutta, ajorluinnartumik isikkoqarpoq. Nunat amerlanersaanni tunillatsissimasut amerliartuinnarput, amerliartuinnarnerallu pitsaanngitlaq.

Nalunaarut aallaqqaammut 2021-mi januaarip 31-ata tungaanut atuutissaaq, atuunneranili sukatereqqittoqarsinnaallunilu allannguuteqartinneqarsinnaavoq, Anna Wangenheim ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER