Corona atuarfimmi tuniluuttoq
Sisimiuni Nalunnguarfiup Atuarfiani atuartut arlallit coronamik tunillatsissimasut paasineqarpoq. Atuartut ilinniartitsisullu arlallit angerlartinneqarput aatsaallu tunillatsissimanngikkunik atuariartoqqissinnaallutik.
Qeqqata Kommuniani ilinniartitaanermut pisortap Nalunnguarfiup Atuarfiani 2. 3. 4. aamma 5. klassini tunillatsittoqarsimasoq uppernarsarpaa.
- Atuartut ilinniartitsisullu angerlartinneqarput aatsaallu tunillatsissimanngikkunik atuariartoqqissinnaapput, Ilinniartitaanermut pisortaq, Annga Lynge oqarpoq.
2. aamma 3. klassimi atuartut oktobarip 13-ani misissorteqqissasut atuarfiup facebookimini paasissutissiissutigaa. Taakkua oqartussaniit, tassa coronalerisuniit attavigineqassagunik maleruaqqusaat malinneqassasut paasissutissiissutigineqarpoq.
- Mianersortoqarnissaanik aammalu maleruaqqusat malinneqarnissaat kaammattuutigaarput. Kisianni innuttaasut annertuumik mianersortut maluginiarparput. Atuartut immikkut mianersorput. Atuarfinni tuniluuttoqarpallaarnikuunngilaq, atuarfiullu avataani tuniluuttoqarnikuulluni, Annga Lynge nassuiaavoq.
Tuniluuttoqarsimaneranik kisitsisit suli nutarterneqanngitsut
Klassini marlunni tunillatsittoqarsimasoq ippassaq sisamanngornermi paasineqarpoq. Tunillatsittoq ataaseq ippassaq aatsaat paasineqarpat nunatta nakorsaaneqarfiani kisitsisini ilaatinneqanngilaq.
Klassit marluk angerlartinneqarnissaaq Qeqqata Kmmuniata aalajangerpaa atuartullu tamaasa angerlartinnagit.
- Kikkut tamarmik ersiuteqartut misissortinnissaat kajumissaarutigaarput. Misissuisarfik (testcenter) atorfissaqalissappat ammaqqinneqarnissaa nalilersussavarput. Maannamut nalinginnarmik misissuineq ingerlanneqarallassaaq, kommunaldirektøri, Juliane Henningsen ippassaq sisamanngornermi Sermitsiaq.AG-imut taama oqarpoq.
Allaaserisap allannerani nunatta nakorsaaneqarfianiit kisitsisit nutaat suli tallimanngornermi nutarterneqanngillaq.