Innuttaasut 50-inik ukioqalereersimasut tamarmik coronamut akiuussuserneqarnissamut, 1.oktober aallarnerfigalugu neqeroorfigitittussanngorput.

Innuttaasut 65-inik ukioqalereersimasut ilanngullugu influenzamut akiuussuserneqarnissamut neqeroorfigineqassapput.

Peqqissutsimut naalakkersuisoqarfik tusagassiorfinnut nalunaaruteqarluni taama ilisimatitsivoq.

Nunatta nakorsaanerata naatsorsuutigaa corona ukioru tuniluutingaatsiassasoq. Amerlanerpaalli tunillatsinnerminnik peruluuteqarnavianngitsut naatsorsuutigineqarpoq.

- Taamaattumik aalajangerpugut akiuussusersuinissamut neqeroorut inunnut perulunnartumik napparsimalersinnaasunut neqeroorutigineqassasoq. Tassa imaappoq 50-ilereersimasut aamma 50-it ataallugit ukiullit immikkut aarlerinartorsiortut, Henrik L. Hansen nassuiaavoq.

Ukioq manna akiuussutissaq tunniunneqartussaq immikkuaaluttunut arlalinnut akiuussusiissaaq. Siusinnerusukkut coronap immikkuualuttuanut tuniluuttumut illersuuteqassaaq, aammali coronamut nutaamut, omicronimut, illersuutaassalluni

. Ukioq manna akiuussutissaq tunniunneqartoq immikkuualuttunik akiuussusersuissaaq. Siusinnerusukkut coronamik akiuussusersuinermi atorneqartumi assinganik illersuutitaqarpoq tamannalu ilutigalugu tunillaassuuttunut nutaanut Omicron-inut siunnerfeqarnerusumik illersuissalluni.

Neqeroorutip tiguneqarnissaa kaammattuutigaa

Nunatta nakorsaaneqarfiata innuttaasut 50-inik ukioqalereersimasut akiuussuserneqarnissamik kaammattorpai. Innuttaasullu 50-it ataallugit ukiullit aarlerinartorsiorsinnaasulli peqqinnissaqarfimmit aamma neqeroorfigineqassasut ilisimatitsissutigalugu.

- Inuusukkunnaarsimagaanni imaluunniit immikkut aarlerinartutut inissisimagaanni Covid-19 suli perulunnartumik napparsimalersitsisinnaavoq. Sapaatit akunneri kingulliit ingerlaneranni nunarsuarmi ullormut agguaqatigiissillugu coronamik peqquteqartumik toqquteqartut 2415-iusimapput, qularutigineqassanngilarlu akiuussutissalernikkut toqusut amerlanerpaartaat pinngitsoortinneqarsinnaasimagaluarmata, taamaattumillu inunnut pineqartunut siunnersuutigerusuppara neqeroorut akuerissagaat, Henrik L. Hansen oqarpoq.

Influenza tuniluussangatinneqarpoq

Innuttaasut 65-inik ukioqalereersimasut influenzamut akiuussuserneqarnissamut aamma neqeroorfigineqassapput. Ukiuni marlunni killilersuisoqareersorlu, influenza ukioq manna tunillaassuunnerussasoq naatsorsuutigineqarpoq.

- Utoqqaat pingaartumik perulunnartumik napparsimalersinnaapput taamaattumillu akiuussuserneqarnissaat innersuunneqarpoq, nunatta nakorsaanera oqarpoq.

Akiuussutissaq coronamut kapitinnermi aamma pineqarsinnaasoq ilisimatitsissutigineqarpoq.

Nunatta nakorsaaneqarfiata coronap tuniluuterujussuarnissaa naatsorsuutigigaluaraa, taamaattoq killilersuisoqaqqinnissaa maannamut pilersaarutigineqanngilaq.

- Naatsorsuutiginngilara killilersuisoqaqqikkumaartoq. Tunillaassuuttut nutaat tuniluutiasuararsuupput taamaattumillu tunillaassuunneq pinngitsoortinneqarsinnaanngilaq, aamma 50-it sinnerlugit ukiullit akiuussusertissimappata napparsimanerat sakkukittuaraassaaq, peqqinnissaqarfimmullu artukkiinissaa ernumassutaasariaqarnani, Henrik L. Hansen oqarpoq.