Conanip suna pisiarisimaneraa takuuk
Conan O'Brienip Nunatsinniinnera pillugu nittartakkakkut takuneqarsinnaalerpoq
USA-mi præsidenti Donald Trump sinnerlugu Kalaallit Nunaat pisiariartorlugu quiasaarisartoq talkshowimilu ilisarititsisartoq Conan O'Brien Nunatsinneeqqammerpoq.
Kalaallit Nunaata pisiarineqarnissaa innuttaasunit soqutigineqanngitsoq erserpoq. Politikerit aningaasanik tuniumagaluarpai isumaat allanngortinniarlugu, angusaqarfiunngitsumik.
Conan O'Brienip tikeraarnermini innuttaasorpassuit naapippai, aallakaatitaq 'Conan without Borders – Greenland' nittartakkatigut marlunngormalli takuneqarsinnaalerluni.
Arferup neqaa puisillu orsua qanoq qisuariarfiginerai aallakaatitami ilaatigut takuneqarsinnaapput. Sermitsiaq.AG-mi assiliisoq Leiff Josefsen aallakaatitami aamma takuneqarsinnaavoq.
Aallakaatitassiaq Conan O'Brienip nittartagaani takuneqarsinnaavoq - tassani Nunatsinniinnerani misigisai takuneqarsinnaallutik.
Naak Kalaallit Nunaat pisiarinngikkaluarlugu allanik pisiaqarpoq. Sunaanersoq aallakaatitap naanerani takuneqarsinnaavoq.