Coding Class kommunini tamani atuutsinneqalersoq
Tusassip misiligummik suliniutaa, Coding Class, meeqqat atuarfiini ilinniarnertuunngorniarfinnilu atuartut digitaliseeriinermik kodelerinermillu ilinniutigisimasaat aalajangersimasumik ilinniartalissavaat.
Ukiut marlungajaat Nunatsinni kommunit tamakkingajallugit suleqatigereerlugit, maanna Tusassip kiisami nalunaarutigisinnaanngorpaa kommuni kingulleq, tassa Kommuni Qeqertalik Tusassilu Coding Classip meeqqat atuarfiannut eqqunnissaanut suleqatigiinnissamut isumaqatigiissummik atsiorsimammata.
Tusass nittartakkamigut taamatut tilisimatitsissuteqarpoq.
Tusassip ilinniartitsinermi siunnersortai marluk kodelersarnermut atatillugu 7. klassimi atuartunuik ilinniartitsisimapput, tassungalu atatillugu Tusassa suliniutip ingerlateqqinneqarnissaanut misilittagaqalersimalluni.
- Suleqatigiinneq nuannaarutigisimavarput torragalugulu Coding Classip qanoq atuartunut nutaaliornermi kodelerinermilu piginnaasanik ineriartortitseqataasinnaasimanera. Kommune Qeqertalimmi Coding Classimi ilinniartitseqqinnissat qilanaarivagut, Kommuni Qeqertalimmi atuarfeqarnermut atatillugu ataqatigiissaarisartoq Nivikka Rosing oqarpoq.
Tusassip kodelerinermi misiliutitut suliniutini 2020-mi aallartissimavaa, massakkumullu Tusassip ilinniartitsinerit Nuummi, Narsami, Qaqortumi, Paamiuni, Sisimiuni, Ilulissani, Uummannami Aasiannilu ingerlassimavai, kiisalu internetikkut ilinniartitsinertaa misiliutitut Qinnguata Atuarfiani Kangerlussuarmiittumi ingerlassimallugu.
Spil og kodning
Atuartut nutaanik spililiorluni kodelerinermik ilinniarnissamut periarfissinneqarsimapput. Atuartut taamaalillutik qarasaasiatiugut ilusilersuinermik ingerlatsinermut, aaqqiissutissanik misissueqqissaarinermut, nutaaliornermut, suleqatigiinnermut saqqummeeriaatsinullu piginnaanngorsarneqarsimallutik, Tusassimit ilisimatitsissutigineqarpoq.
- Nunarsuarmi ineriartortuaannartumi inooqatavugut, pingaartumik digitalip tungaatigut. Teknologiikkut ilisimatusarnermik ingerlatsisinnaaneq kodelerinerlu suliffeqarfinni aamma pilerinarneruleraluttuinnarput, Tusassimi pisortaaneq Kristian Reinert Davidsen oqarpoq, nangillunilu:
- Kissaatigaarput kinguaariit tullii akornanni kodelerinerup ilisimaneqarnissaa teknikkikkullu pilersitsinermut piginnaasanik peqalernissaat. Taamaalillutik ukiukinnerminniit digitaliseringip iluani suliaqarsinnaaniassammata. Coding Classip nuna tamakkerlugu atugaalernissaanut Tusassip suliniuteqarsimanera tulluusimaarutigaarput.
Tusass aamma Ilinniarfissuup aamma GUX Nuup suleqatigiillutik misiliutaasunik suliniutinik aallarniinerinik kinguneqartitsisimavoq.