Claus Hjort: Kalaallit Nunaanni timmisartunik malersuuteqalerniaraanni nutaanik pisisoqartariaqarpoq

Illersornissamut ministerip Kalaallit Nunaanni timmisartunik malersuuteqartuaannalernissaa eqqarsaatigaa. Tamatuma qanoq akeqarnissaa

Qallunaat timmisartui malersuutit siunissami Kalaallit Nunaanniittuaannalernissaat pisariaqalersinnaasoq, illersornissamut ministerip Claus Hjort Frederiksenip Berlingskemi ataasinngornermi oqariartuutigaa.

Naalagaaffeqatigiit iliuuseqarsinnaannginneranni Ruslandip piffissap ingerlanerani timmisartut malersuutit kalaallit silaannaannut timmisalersinnaanerat ministerip ernumassutigimmagu.

Taamaattorli Danmarkip minnerpaamik timmisartut malersuutit sisamat upalungaarsimanermi taama ittumi pisariaqartinneqartut pinngitsoorsinnaanngilai, Claus Hjort Frederiksenilu Ritzauimit apersorneqarnermini, tamanna nutaanik pisinermik pisariaqartitsinerarpaa.

- Russit Kalaallit Nunaata silaannaanut unioqqutitsillutik pisalissagaluarpata, piffissamut tassunga timmisartunik nutaanik amerlanerusunik pisisariaqarpugut, taanna oqarpoq.

Timmisartunut nutaanut aningaasat suminngaanniit pissarsiarineqassappat?

- Aap, nalinginnaasumik aningaasanik pissarsiffigisartakkatsinnik. Akileraartartut aningaasaataannit.

Kisianni illersornissaqarfiup nammineq aningaasaateqarfianit imaluunniit aningaasaleeqqinnikkut?

- Kalaallit Nunaanni upalungaarsimasunik pisariaqartitsisoqalersoq paasigutsigu, isumaqatigiinniartartut tamanna oqaluuserissavaat.

Illersornissaqarfiup maanna suliassaqarfianit timmisartunik nuussinissaq eqqarsaatigineqanngilaq?

- Naagga, tamanna ilassuteqarnikkut pisariaqassaaq.

Folketingimi amerlanerussuteqartut qanittukkut amerikamiut F35-iinik timmisartunik malersuutinik atuunnerinut aningaasartuutit ilanngullugit 66 milliardit koruunit nalinganut pisinissartik aalajangiuppaat.

Naatsorsoruminaattoq

Naatsorsuineq pisariuvoq, ataatsillu akia eqqoqqinnaartumik oqaatigiuminaappoq.

Kisianni Claus Hjort Frederiksenip oqarnera naapertorlugu ataaseq 750 millionit koruuninik akeqartoq oqaatigissallugu uniorpallaanngilaq.

Taamaalillunilu Kalaallit Nunaanni timmisartut sisamat upalungaarsimasut minnerpaamik 3 milliardit koruuninik aamma illunut, hangarinut allanullu aningaasartuutit ilanngullugit aningaasartuuteqarfiussaaq.

Katillugu aki piviusorsiorpalaartoq qanoq oqaatigineqarsinnaava?

- Illut suliarineqarnerinut tamatumunngalu aningaasartuutinut ilisimasaqanngilanga.

- Kisianni oqaatigiinnarusuppara danskit silaannaata illersornissaanut akiliinissamut pisussaaffeqarpugut, taava pisariaqalissappat aningaasat nassaarisariaqarpagut, Claus Hjort Frederiksen oqarpoq.

Kalaallit Nunaanni upalungaarsimasut maanna Kangerlussuarmi imaluunniit Pituffimmi mittarfinni sakkutooqarfiusuni inissisimasinnaanerat takorloorpaa.

Powered by Labrador CMS