CL-finalimi Liverpoolip periarfissarissaarneruneranik Klopp takusassaqanngilaq
Naak Liverpool Premier Leaguemi pitsaanermik angusaqaraluarluni, CL-finalimi periarfissarissaarnerunngilaq, Jürgen Klopp taama isumaqarpoq.
Premier Leaguemi sæson naammassimmat, Liverpool aamma Manchester City pointimik ataasiinnarmik nikingapput, kingulliit pissartanngorlutik.
Liverpool ataatsimut isigalugu sæsonip ingerlanerani Tottenhamimit pitsaanerusumik ingerlagaluartut, arfininngornermi Champions Leauguemi finalimi ajugaasut aappaat periarfissarissaarnerunngillat.
Liverpoolimi sungiusaasoq, Jürgen Klopp, tallimanngornermi tusagassiortunik katersortitsinermi taama oqarpoq.
- Ligami pointeqarnerugatta ajugaanissarput inunnit ilimagineqarnerusoq nalunngilara. Kisianni sæsonimi Tottenhamimut unammisimanigut qiviarukkit, taamaallaat 2-1-mik (Liverpoolimut, aaqq.) naammassipput. Unamminermi periarfissarissaarnerunngilagut, Jürgen Klopp, uefa.com naapertorlugu taama oqarpoq.
Liverpool aamma Tottenham semifinalimi ajornartorsiorput, taakku Barcelona aamma Ajax pissanganartumik unammereerlutik ajorsartippaat.
Ukiut tulleriisiinnarlugit Liverpool finalimut annguppoq. Kloppip arsartui siorna Real Madridimut 1-3-mik ajorsarput.
- Unamminermi tassani periarfissat amerlanngitsut atornerlunngilagut. Siorna finalimut anngukkatta immitsinnut tupaallatsippugut. Tassani maannatut allanngujaatsiginngilagut, tyskeq sungiusaasoq oqarpoq.
Brasiliamioq siukkaq Roberto Firmino kingullertigut nukimmigut ajoquseqqavoq, ilaatigullu Barcelonamut unamminerup aappaa peqataaffiginngitsoorlugu.
Kisianni Firmino arfininngornermi unamminissamut piareersimavoq, Liverpoolimi sungiusaasoq neriorsuivoq.
- Firmino piareersimavoq. Aallarteqqaassava? Apeqqut tamanna ammatikkallarpara.
Kisianni ajoquseqqanngilaq, aamma peqataassaaq. Arlaannik pisoqanngippat piareersimavoq, Jürgen Klopp oqarpoq.
Liverpoolip aamma Tottenhamip finalernerat arfininngornermi nunatsinni nalunaaqutaq malillugu 17 Madridimi Wanda Metropolitanomi pissaaq.
/ritzau/