nipilersorneq
Christians Kirke-mi issittormiut nipaat
Pamya aamma Arktjiks Københavnimi tusarnaartitsinissaminnik pilersaaruteqarput
Københavnimi Inuit. Nipilersoqatigiit Alaskameersut nersornaaserneqarsimasut Pamya pingajuusartullu Arktjiks, Kalaallit Nunaanneersut Danmarkimeersulluk, septembarip 6-anni Københavnimi Christians Kirke-mi ataatsimut tusarnaartitsiniarput.
Nipilersoqatigiit taakkua marluk Inuit-kulturiannik sorlallit nipilersoriaatsit soulfunk, pop, jazz aama trip hop ingerlataraat, taamatut paasissutissiivoq isiginnaartitsisartoq erinarsortartorlu Nukâka Colster-Waldau.
– Arktjiks nipilersoqatigiit pingasuusartut pilersinneqaqqammerput, tassanilu ilaasortaapput kalaallit arnat erinarsortartut Karina Møller, Aviaja Lumholt aamma Nukâka Coster-Waldau. Taakkua ukiorpassuarni Nunatsinni Danmarkimilu kisimiillutik erinarsortartutut tusarnaartitsisarsimapput.
Pingasuusartut DR-TV-mi Danmarks Radios Big Band peqatigalugit aliikkusersuisimapput, aammalu Odensemi Nordatlantisk Husimi nipilersorsimallutik, kiisalu aamma Buxellesimi Namminersorlutik Oqartussat Sinniisoqarfianni, Washington D.C.-mi Københavnimilu.
Pamya tassaapput nipilersoqatigiit inuit/yup´ik-it Alaskameersut. Nipilersoriaasertik namminneq taavaat "tribalfunk"-imik.
Pamya nunarsuaq tamakkerlugu tusarnaartitsillutik angalasarsimapput, CD-nik tallimanik saqqummersitsisimallutik arlalissuarnillu nersornaatisisimallutik, ilaatigut Record aamma Native American Music Awards.
Pamya-mi ilaasortaapput qatanngutigiit Phillip aamma Stephen Blanchett, Ossie Kalraluak aamma kalaaleq Karina Møller.
Nipilersoqatissaat nipilersullammaat tassaapput Kristoffer Jul Reenberg, noqartilik, Nikolaj Pals Frandsen, bas, aamma Anders Pedersen, tumerparpaat.