Skip to main content

Chile qularnaatsumik ajugaavoq

Unamminermi Kalaallit Nunaat aallartilluaraluartoq, Chile 37 - 29-mik ajugaavoq

Amerikap nunavittaani Argentinami Buenos Airesimi pissartanngorniunnermi Chile aamma Kalaallit Nunaat unamminerni siullerni marlunni ajugaaffigineqanngillat. Kalaallit Nunaata ukiut marluk matuma siorna Uruguayimi ajorsarnertik akiniaatiginiarlugu takorloorpaat. Taamani Chile 29 - 24-mik ajugaavoq.

Kalaallit Nunaanni arsartut aallartilluaraluarput, 4 - 1-mik siuarput, Chile målernissaminut ajornartorsiorpoq. Minutsit qulingiluat ingerlaneranni måli ataasiinnaq kalaallinut isumalluartitsivoq. Kalaallit siuaqqanertik attatiinnarpaat, 11-9, muminnissamulli minutsit marluinnanngortut Chile isertitsigami naligiilerput. Muminnermi 16 - 16-erlutik naligiipput.

Atuaruk: Kalaallit Nunaat 36 - 24-mik Mexicomut ajugaavoq

Immikkoortup aappaa
Chile aallartilluarneruvoq, minutsit tallimat ingerlareersut Amerika Kujallermeersut 21 - 18-mik siuarsimapput. Kalaallit Nunaata Chilep illersuisui akulloqqunnissaat ajornakusoortikkiartuinnarpaat. Minik Dahl Høegh piffissap ilaani kisimi unammisutut ikkaluartoq, tamanna naammanngilaq.

Immikkoortup qiteqqunnerani Chile 26 - 22-mik siuarsimavoq. Sungiusaasup Niels Møllerip unikkallartitsilluni kalaallit angummatseriaraluarpai. Unamminerup naammassinissaanut minutsit aqqaniliinnanngortut Miki Duko Sørensen sakkortusaarmat aappaluttulerneqarpoq. 

Chilep qularnaatsumik arsarnini attatiinnarpaa, sakkortuumik assersuillutik siuariartorput, unamminerlu naammassimmat 37 - 29-mik ajugaapput.

Atuaruk: Kalaallit Nunaat siullermeerluni unamminermini ajugaavoq

Ajorsarnermut pissutaasut arlallit
Nunanut allanut unammisartunut sungiusaasoq, Niels Møller, ajorsarneq arlilinnik pissuteqartoq unamminerup naammassinerata kinguninngua oqaluttuarpoq.

- Uagutsinnit misilittagartunerusunik amerlanernik arsartoqarput. Ukiorpassuarni europami klubbini pitsaasuni unammisartut arlallit arsartartuupput. VM-ernerit tamaasa pitsanngoriartuinnavipput, aammalu minnerunngitsumik Chile timimikkut ataatsimik marlunnilluunniit siuarsimanerupput.

Chile unammisartutsialaqarpoq
Amerikap nunavittaani pissartanngorniunnerni kingullerni pingasuni bronzinnannerat nalaatsornerinnaanngilaq. Taakku semifinalimut anngutinngitsuussappata ajortoqangaatsiaqqaartariaqassaaq. Chile spaniamiumit tusaamaneqarluartumit Mateo Garraldami sungiusarneqartarpoq, taanna 233-eriarluni Spaniamut unammeqataasarnikuuvoq.

Unammisartut piareersimalluarlutik unammiartuaannarput, unammisartullu arlallit Europami klubbini unammisartuupput. Rodrigo Salinas Chilep unammisartuini tusaamasaanerpaavoq. Chile aamma qatanngutigiinnik pingasunik arsartoqarpoq, Harald, Erwin aamma Emil Feutchmann.

Marlunngorneq qasuersaarfiuvoq
Ullumi marlunngornermi qasuersaarfiup kingorna pissartanngorniunnerit pingasunngornermi aallarteqqissapput. Kalaallit unammisartui suleruloqqissapput. Ajugaasussatut ilimagineqartut Argentina tassa utaqqipput.

Kalaallit Nunaat tassani unamminermi ajugaassappat, minnerusumik tupinnartuliortoqartariaqassagunarpoq. Paasisagut naapertorlugit, måliniittoq Frank Mikkelsen ullumi Buenos Airesimut tikippoq. Unamminerni siullerni pingasuni taanna maqaasineqarpoq, aammalu immaqa Argentina unammillerneqarnissaanut ikiuutaasinnaavoq.

Kalaallit isertitsisut

  • Minik Dahl Høegh 16 
  • Akutaaneq Kreutzmann 4
  • Aqqalu Ingemann 3
  • Miki Heilmann 2
  • Nuka Heilmann 2
  • Lars O. Lyberth 1
  • Nuuno Lars Olsen 1

Ataasinngormat unamminerit allat
Kalaallit Nunaata gruppiani Argentina 42 - 17-imik Mexicomut ajugaavoq, aamma Canadap Guatemala 27 - 24-mik ajugaaffigaa. Gruppip aappaani inernerit ukuupput Brasilia-Colombia 42 - 10, Puerto Rico-Paraguay 34-26 kiisalu Uruguay-USA 26-21.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER