Skip to main content

Chemnitz Høegh-Damilu kalaallit betjentit naligiimmik aningaasaqarsiaqartinneqalernissaannik sorsuuteqarput

Kalaallit betjentit aningaasarsiaannut tapiliunneqarallarsimasoq pitsaalluinnartumik sunniuteqarsimavoq, aningaasalli illikartinneqarsimasut nungulerput. Aningaasarsiassallu pillugit isumaqatiginninniarnermi unittoortoqarsimavoq.

Kalaallit Nunaanni politiit pinerluuteqarsimasunullu inissiisarfinni betjentit aningaasarsiassaannut tunngatillugit isumaqatiginninniarnerit unittoorsimapput, Kalaallit folketingimi ilaasortat marluk Aaja Chemnitz (IA) aamma Aki-Matilda Høegh-Dam (S) taamatut ilisimatitsissuteqarput. Taakku oqaatigaat, politikkikkut akuleruttoqartariaqartoq.

Fængselsforbundemit Kalaallillu Nunaanni Pinerluuteqarsimasunik isumaginnittoqarfimmit 2020-mi nuannaartoqarpoq, taamanikkummi 50 millioner koruuningajalluinnaat aningaasarsiat qaffaatissaannut atugassatut immikkoortinneqarput, taakku ukioq 2023 ilanngullugu ukiumut agguataarneqartussaallutik.

40 millioner koruunit pinerluuteqarsimasunut inissiisarfimmi betjentinut atugassiaapput, sinneruttullu 10 millioner koruunit nunami politiinut atugassiaallutik. Sulisussanik nutaanik pissarsiniartarnerup ajornakusoorfiani aningaasat atorfissaminnut nakkartinneqarsimapput.

Assersuutigalugu Nuummi pinerluuteqarsimasunut inissiisarfik taamanikkut sulisussat 40 procentiisa amerlassusaannik amigaateqarpoq.

Høegh-Dam akileraartarnermullu ministeri

Ullumikkut pissutsit allarluinnaapput. Fængselsforbundimit oqaatigineqarpoq, pinerluuteqarsimasunut inissiisarfimmi betjentinik amerlanerusunik sulisussarsiorneq iluatsissimasoq aamma suleqatit ilinniakkaminnik naammassinnissimasut sulisoriinnarniarneqarneri iluatsinneqarsimasoq. Det Nationale Forsknings- og Analysecenterip misissuinermini allami inerniliussimavaa, pinerluuteqarsimasunut inissiisarfimmi betjentit 2020-miilli tarnimikkut peqqissusaat pitsaanerulersimasoq.   

Aaja Chemnitz naapertorlugu, tamanna nunatsinni politiit amerlassusaannut pitsaasumik aamma sunniuteqarpallaarsimanngilaq. Taanna isumaqarpoq, tamanna aningaasarsiat qaffanneqarsimagaluartut - sulisut akornanni naligiimmik suli aningaasarsiaqartitsisoqannginneranut attuumassuteqartoq.

Siumut sinnerlugu Folketingimi ilaasortaq Aki-Mathilda Høegh-Dam akileraartarnermullu ministeri Jeppe Bruus ajornartorsiut tamanna oqaluuseriniarlugu sisamanngornermi ataatsimeeqatigiipput. Aki-Mathilda Høegh-Damip Kalaallit Nunaanni politiit naligiimmik aningaasarsiaqartinneqarnissamik kissaataasa tusarneqarnissaat qulakkeerusussimavaa.

- Kalaallit betjentit nunasiaateqarnermi aqutseriaasitoqaq aallaqqaammulli akunnitsinni ajoqusiisimasoq tunngavigiinnarlugu, aningaasarsiatigut naligiimmik atugassaqartinneqarnissamut itigartinneqarnerat ajorluinnarpoq. Nalunngilarali tamanna allanngortissinnaagipput allanngortittariaqarippullu, Aki-Mathilda Høegh-Dam oqarpoq.

Folketingimi Aningaasarsiaqarnermut siunnersuisoqatigiit

50 millioner koruunit - Kalaallit Nunaanni pinerluuteqarsimasunut inissiisarfimmi betjentimut ataatsimut aningaasarsiatigut 5.600 koruunit 7.000 koruunillu akornanni tapiliussassatut politiillu aningaasarsiaasa qaffanneqarnissaannut qulakkeerneqarsimasut nungulluinnalerput.

Isumaqatiginninniartut arlaleriarlutik Kalaallit Nunaanni politiinut pinerluuteqarsimasunullu inissiisarfimmi betjentinut siunissami aningaasarsiatigut atorfeqarnikkullu atugassarititaasussat oqaluuserisimavaat, maannamulli isumaqatigiissinnaasimanatik.

Taamaammat isumaqatiginninniarnerit Folketingimi Aningaasarsiaqarnermut siunnersuisoqatigiinni ingerlanneqartussanngorput.

- Pingaaruteqarluinnarpoq pitsaasumik isumaqatigiissuteqarnissap qulakkeerneqarnissaa, Aaja Chemnitz aaqqiissutaagallartussamik siumaqatigiissuteqartoqassappat naammaginninngitsoq oqarpoq.

Politikkikkut suliaqartoqartariaqartoq

50 millioner koruuunit atlantikup avanaanut immikkoortitanit tiguneqarsimasut - Aaja Chemnitz naapertorlugu - politikkikkut aaqqiissuteqapallannerupput. Danmarkimi naalakkersuisut akisussaaffimminnik tigusillutik ataavartussamik aaqqiissutissarsiortariaqarput, taanna oqarpoq.

Folketingip qinersisoqarnissaa qalliartortillugu ajornerpaamik pisoqassappat tamatuma qanoq sunniuteqarsinnaanera apeqqutigineqarmat, Aaja Chemnitz oqarpoq, aningaasarsiatigut aallaqqaammut atugasssarititaasunut utertitseqqiisumik isumaqatigiissuteqanngitsoornera ajornerpaajussasoq. Nammineerlunilu aaqqiissutissarsisoqarumaartoq upperaa, aaqqiissutissarsiorlunili politikkikkut suliaqartoqartariaqartoq oqaatigalugu. 

- Pitsaasumik isumaqatigiissuteqartoqarneratigut politiit danskit isumaqatigiissutaat malillugit aningaasarsiaqartinneqalissapput, pinerluuteqarsimasunullu inissiisarfimmi betjentit aningaasarsiaqarnerulissallutik, tamanna ataavartumik pisariaqartippaat.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER