Charlotte Pike Inatsisartuniit tunuarpoq
IA sinnerlugu Inatsisartuni ilaasortaq Charlotte Pike Inatsisartuniit tunuarniuteqarluni qinnuteqarsimavoq, siulittaasoqarfimmiillu akuerineqarluni. Ittoqqortoormiini ilaquttani najornerujumallugit taama aalajangersimavoq.
Charlotte Pike (IA) Inatsisartunit ingerlaannartumik atuutilersumik tunuarniuteqarpoq. Inuit Ataqatigiit sinnerlugit Inatsisartuni ilaasortaasuni pingajuulluni taamaasilluni tuniarniuteqarpoq. Sofie Geisler aamma Pipaluk Lynge-Rasmussen allamik atorfittaarnertik pissutigalugu aamma tunuarniuteqarsimapput.
Charlotte Pike Inatsisartunut upernaakkut 2021-mi sinniisutut qinigaavoq. IA Naalakkersuisuutitaqalermat, ilaasortaasullu arlallit Naalakkersuisuunerminnut atatillugu Inatsisartunit sulinngiffeqarnissamik qinnuteqarmata, Charlotte Pike sinniisutut issiasussatut ivertinneqarsimavoq.
Charlotte Pike Sermitsiaq.AG-mut nassuiaavoq tunuarnissamik aalajangerami ilaquttani pingaartumilli meeqqani arfinilinnik, aqqanilinnik 13-inillu ukioqartut najornerorusullugit siunertaralugu.
- Aalajangerniarneq sivisusimavoq, qaammatit marluk missaat eqqarsaatigeqqaarsimavara. Aalajangernissarli ajornarpallaanngilaq, meeqqakka peroriartorneranni najorusukkakkit, Sermitsiaq.AG-mut oqarpoq.
Qaammatini arlalinni qimaqqasarai
Inuit Ataqatigiit Facebookianni Charlotte Pike nassuiaateqarpoq Inatsisartut ukiumut marloriarlutik ataatsimiittarneranni qaammatini arlalinni qitornani qimaqqasaramigit, meeraasut peqqinnerat ineriartornerallu malunnaatilimmik allanngorsimasoq.
- Meeraaneranilli tamanna qamani ernumaatigisalersimasaat "anaana sivisuumik aallaqqasussaasoq" pigitikkunnaarnissai pingaaruteqalersimavoq piffissanngorsimallunilu, allappoq.
Inatsisartut ukiumut marloriarlutik, qaammatit marluk missaannik sivisussuseqartumik, ataatsimiittarput.
Charlotte Pike Inatsisartunut sinniisutut aprilimi 2021 qinigaavoq. Qinigaaneq taanna sioqqullugu Pike kommunalbestyrelsemi aaamma ilaasortaasimavoq, 2013-imi qinigaaqqaarluni.
Ukiuni arlalinni politikeriusoq
Politikeritut tunumi illoqarfiit nunaqarfiillu ineriartortinneqarnissaata ukkatarineqarnerunissaat anguniartuarsimavaa. Suliarlu taanna suli soqutigilluinnarlugu, illoqarfigisanilu Ittoqqortoormiit ineriartortikkusullugu, Sermitsiaq.AG-mut nassuiaavoq.
- Illoqarfimma ineriartortinnissaa soqutigilluinnarpara. Politikkimik siunissami suliaqaqqilissanersunga suli nalunarpoq. Illoqarfitsinnulli tikittoqartillugu oqaloqatigiinnissamik immersueqatigiinnissamullu ammavugut, oqarpoq.
Charlotte Pike atorfimminut maanna utersimalerpoq. Kommuneqarfik Sermersuup Ittoqqortoormiini immikkoortortaqarfiani kulturimut sunngiffimmilu susassaqartitsinermut immikkoortortaqarfimmi pisortaavoq. Ukiuni qulinngulersuni maanna atorfeqarpoq.