Charlotte Ludvigsen: Taamaammat tunuarpunga
Kommuneqarfik Sermersuumi inissiat pillugit aaqqiagiinngittoqareersoq, suliallu allat pissutaallutik, kommunimi borgmesteri Charlotte Ludvigsen borgmesteritut tunuarniuteqarpoq.
Inga Dora Markussenimit, Siumup kommunalbestyrelsianit kiisalu Demokraatinit borgmesteritut tunuarnissamik kaammattorneqareerluni Charlotte Ludvigsen Kommuneqarfik Sermersuumi borgmesteritut tunuarpoq.
- Inuit atugarissaarnerulersinniarlugit politikkikkut allannguutit pilersitagut politikkimik suliaqarninni pingaarnertut siunertaajuaannarput. Taamaattuaannassaarlu, borgmesteritut tunuartoq oqarpoq.
Suliat suli amerlisinnaasut
Suna tamaat angullugu borgmesteriusinnaanani oqarpoq.
- Inuk kinaluunniit IA-mi politikkikkut anguniakkatsinniit annerulinngisaannarlunilu pingaarnerulinngisaannassaaq. Taamaammat politikkikkut angusagut attatiinnarniarlugit Kommuneqarfik Sermersuumi borgmesteritut 2022-mi juunip 15-iani tunuarniarlunga aalajangerpunga, Charlotte Ludvigsen oqarpoq.
- Kommuneqarfik Sermersuumi suliat pisariullutillu ajornakusoorput, tatigineqanngikkumalu politikkikkut ingerlanniakkagut anguniarnissaanut kommuunitsinni siuttutut inissisimasinnaanngilanga.
Kommuneqarfik Sermersuumi aasarli torersaaneq ingerlanneqarsimasoq oqaatigaa.
- Suliat arlallit saqqummertut, torersaanerulli ingerlanerani takuttoqaqqinnissaa ilimagineqartariaqarpoq. Uangali akisussaatinneqarniarsinnaanngilanga iliuuserisimanngisannik aammalu inatsisinik unioqqutitsineragaasinnaanngilanga, oqarpoq.
Killissaa tikissimagaa
- Inuttut killissara anguara. 2020-mi kukkussutikka pillugit utoqqatserpunga. 2020 ukioq ukiunit allanit allaanerusoq oqaatigisariaqarpoq. Kingumut qiviaruma ilisimasaqarluartumik torersumillu siunnersorneqarnissara amigaataasoq takusinnaavara, soorlu novemberimi 2021-imi nalunaaruteqarama oqartunga, tatiginninnera kommunaldirektøriusimasumit atornerlunneqarsimavoq.
- Kommunalbestyrelsemi IA sinnerlugu ilaasortat suleqaterput Naleraq peqatigalugu kingoraartissara pillugu piaartumik tusagassiutitigut nalunaaruteqarumaarput, Charlotte Ludvigsen oqarpoq.