Charlotte Ludvigsen tunuarnianngilaq
Kommuneqarfik Sermersuumi borgmester Charlotte Ludvigsenip nakkutilliisoqarfiup ininik attartortitsisarnermut tunngatillugu aalajangiinerminni tunngavilersuutai utaqqeqqaarumavai. Maanna borgmesteritut tunuarnianngilaq.
Kommunalbestyrelse ataatsimoorluni aallaqqaataaniilli aalajangiisarsimammat borgmesterip tunuarnissaanik kaammattuuteqarneq maanna inissaminiinngilaq.
Kommuneqarfik Sermersuumi borgmester, Charlotte Ludvigsen (IA) taama isumaqarpoq. Demokraatit tunuaqqusillutik sapaammi ualikkut kaammattuuteqareersullu borgmesteri taama akissuteqarpoq.
Sermitsiaq.AG-mut nassuiaavoq nakkutilliisoqarfiup aalajangiinerminut tunngavilersuutai paaseqqaarusunnerullugit, maanna sumilluunniit iliuuseqarnermiit.
- Uggoraara Demokraatit taama nalunaaruteqarnerat, Charlotte Ludvigsen oqarpoq nangillunilu:
- Nakkutilliisoqarfiup aalajangernerminut tunngavilersuutai paasiumallugit piumasaqarnikuuvugut. Isumaqarpungalu taama kaammattuuteqarneq Demokraatit tungaanniit pipallataavallaartoq. Tunngavilersuutit suuneri paaseqqaarusunneruakka, Charlotte Ludvigsen Sermitsiaq.AG-mut oqarpoq.
Aalajangiinerlunnerit
Sermersuumi Demokraatit borgmesteri tunuaqqullugu ullumi kaammattorpaat. Demokraatit ilaatigut tunngavilersuutigaat suliani tulleriinni borgmesteri kukkusumik aalajangiisarsimasoq, soorlu ilaatigut ininik attartortitsinermut tunngatillugu, borgmesterip atsiorneratigut kommunalbestyrelsemi aningaasaqarnermut ataatsimiititaliaq ilisimatinnagu Iserit 20 milliuunit koruuninik kommunimit attartortinneqarsimalluni.
Borgmester Charlotte Ludvigsen tusagassiorfinnut nalunaaruteqarluni siusinnerusukkut nassuiaateqarsimavoq atorfilinnit kukkusumik paasitinneqarsimalluni.
Taanna Sermitsiaq.AG-mut oqaluttuarpoq atorfilittat sulineri aamma tatigisariaqarlugit, taamaammallu ininik attartortitsisarnermut tunngatillugu nassuiaataat tatigisimallugit.
- Imminut illersorsinnaanngilaq atorfilittat namminerisamik sulinerat tamaat uanga akisussaaffittut tigussagukku. Sulianilu paasisaqaraangama periuseraara tamatigut pingaartumik aningaasaqarnermut ataatsimiititaliaq, aammali kommunalbestyrelse tamaat, ilisimatissallugu, oqarpoq nangillunilu:
- Aamma paasisinnaanngilara Demokraatit taama nalunaaruteqarnerat, Demokraatimmi aallaqqaataaniilli politikkikkut aalajangeeqataasarnermik suliaqaqataapput.