Charlotte Ludvigsen borgmesteritut ivertinneqarpoq
Kommuneqarfik Sermersuumi kommunalbestyrelsenngortoq inissititerluni ullumi ataatsimiimmat Charlotte Ludvigsen tamanit innersuunneqarluni borgmesteritut toqqarneqarpoq.
34-nik ukiulik Charlotte Ludvigsen Kommuneqarfik Sermersuumi kommunalbestyrelsep inissititerluni ataatsimiinnerani borgmesteritut ingerlaqqittussatut innersuunneqarpoq qinerneqarlunilu.
- Ukiuni tullerni tamatta uummateqarluta sullissilluassasugut qularinngilara. Innuttaasut Paamiuniippata, Ittoqqortoormiiniippata, Tasiilamiippata Nuummiippata nunaqarfiiniippataluunniit, tamatta uummateqarfigalugit sullissilluarluta sulissaagut, Charlotte Ludvigsen ivertinneqarami oqalugiummini oqarpoq.
Borgmesterinngoqqittoq naatsorsuuteqarpoq qinikkat ataatsimiititalianiuppat kommunalbestyrelsemiuppalluunniit suleqatigiilluassasut.
- Qineqqusaarneq naammassivoq, uagut qinersisartut sinnerlugit aallartitatut sulissaagut. Naatsorsuutigineqassaaq inuiaqatigiinni sullissinitsinni allannguinissat annertuut suliarissagigut. Atuarfinni, innarluutillit sullinneqarnerini, inuussutissarsiornermilu allannguinerit annertuut ingerlatissavagut. Taakku qilanaarnartorujussuupput, oqarpoq.
Justus Hansen (D) 1. viceborgmesterinngorpoq, Emanuel Nûkolu 2. viceborgmesterinngorluni.
Ataatsimiititaliat inissipput
Inissititerluni ataatsimiinnermi ilanngullugu ataatsimiititaliani ilaasortat siulittaasullu innersuunneqarput toqqarneqarlutillu. Inuit Ataqatigiit, Demokraatit aamma Naleraq ukiuni sisamani tullerni suleqatigiissallutik isumaqatigiissimapput, Siumullu illuatungiliuttuulluni.
IA, D aamma N qinersinerup kingorna kommunimi amerlanerussuteqangaatsiarpoq, taamatullu ataatsimiititaliani aamma amerlanerussuteqangaatsiartussanngorluni. Siumut aningaasaqarnermut inuussutissarsiornermullu ataatsimiititaliami marlunnik ilaasortaatitaqartussanngorpoq, ataatsimiititaliallu sinnerini ataatsimik taamaallaat ilaasortaatitaqassalluni.
Ataatsimiititaliat ima inissipput:
Aningaasaqarneq aamma inuussutissarsiorneq:
- Charlotte Ludvigsen, IA, siulittaasoq,
- Justus Hansen, D
- Juaaka Lyberth, IA
- Uju Petersen, IA
- Kim Madsen, N
- Martha Abelsen, S
- Inga Dora G. Markussen, S
Meeqqanut atuarfinnullu ataatsimiititaliaq:
- Juuaka Lyberth, IA, siulittaasoq
- Poul Petersen, D
- Emamuel Nûko, N
- Mia Skifte Lynge, IA
- Dorthe Marie Mogensen Fontain, S
Sanarfinermut avatangiisinullu ataatsimiititaliaq:
- Justus Hansen, D, siulittaasoq
- Uju Petersen, IA
- Naya-Sophia Lyberth, IA
- Lone Rosengreen Pedersen, IA
- Peter Davidsen, S
Meeqqanut ilaqutariinnullu ataatsimiititaliaq:
- Avaaraq Olsen, IA
- Mia Skifte Lynge, IA
- Naya-Sophia Lyberth, IA
- Harald Bianco, IA
- Laura Taunajik Uitsatikitseq, S
Sulisoqarnermut isumaginninnermullu ataatsimiititaliaq:
- Inge Olsvig Brandt, IA
- Lone Rosengreen Pedersen, IA
- Avaaraq Olsen, IA
- Poul Petersen, D
- Mala Høy Kuko, S