Challengerimik Kalaallit Nunaat qulaallugu suliaqarneq

Luftgruppe Vestimi timmisartortartut Kangerlusssuarmi ineqarfianni apriilip 11-ani 2014-imi nal. 0700 ullaakkorsioqatigiittoqarpoq.

Timmisartumik iluarsaasartoq Rene Munch makiaarsimavoq sakkutuullu timmisartortartut timmisartuanni Challengerimi inuttanut ullaakkorsiutissanik iffiorsimalluni.

Timmisartoq Challenger sorsunneqannginnerata nalaani suliassanik arlalissuarnik isumagisassaqarluni Kalaallit Nunaanni akuttunngitsumik inissisimatinneqartarpoq.

Timmisartortartoqatigiit pingaarnertut suliassaat tassaavoq nunap namminersortuuneranik isumaginninnissaq, tamatumalu saniatigut ujaasinernik, napparsimasunik angallassinermik, aalisarnermik nakkutilliinermik, avatangiisinik alaatsinaannermik, sikunik nalunaarsuinermik kigaallassaatillu atorlugit taquassanik atortussanillu nakkaatitsinermik
allanillu suliassat.

Timmisartup naalagaa Martin Groth Jensen timmisartortartorlu Michael Louw Marboe ullaakkorsiorluareerlutik Kangerlussuarmi mittarfimmi silasiortuliarput silamik nalunaarummik paasiniaallutik. Ulloq taanna Kalaallit Nunaanni sila nalinginnaasumik pitsaavallaanngilaq, kisiannili Mestersvigimi Danmarksstrædemilu sumiiffimmi annertunngitsumi ajorpasigani.

Inuttat timmisartumik iluarsaasartoq Rene Munch kisiat minillugu tamatuma kingorna suliaqarnermut nakkutilliivimmi naapeqatigiipput. Rene Munch timmisartortartoqatigiit mittarfimmi sulisuat aalajangersimasoq Flemming Hougaard peqatigalugu timmisartoq hangarimit kalillugu anillatsinniarlugu suliaqalerput. Timmisartortartoqatigiinni timmisartortutmarluk timmisartumillu iluarsaasartup saniatigut inuttat allat marluupput, Peter Christian Andersen aamma Ole Busk

Fischer, aqutsinermik suliaqartuusut. Suliaqarnermut nakkutilliivimmi ullormut suliassaq pilersaarusiorlugu aallartipput. Danmarks Strædeliassaagut aalisariutillu puisinniarnermik ingerlataqartut tamaaniinnissamut akuersissutaateqarnerat misissoriartorlugu.

Tamatuma saniatigut angerlariartornitsinni Mestersvigimi mittarfimmi napasuliami sulisunut marlunnut Qimusseqatigiinnullu 2-mut Ella Ø-miittunut taquassanik nakkartitsiartussaagut. Timmisartup naalagaa ullormut suliassaq pillugu nalunaaqutaq 08.30 ilisimatitsissuteqarpoq tamatumalu kinguninngua Challengeri Kangerlussuarmit aallarluni. Akunnerit marluk missiliorlugit qaangiummata Danmarks Strædemi aalisarnermik nakkutilliineq suliarilerparput. Tamaaniipput Norgemiut aalisariutaat pingaasut, puisinniarnissamut akuersissutaateqartut.

Timmisartoq tamatuma kingorna Mestersvigimi mittarfiup tungaanut ingerlaalerpoq, tassanilu napasuliami sulisut taquassanik nakkartitsivigineqarlutik. Mestersvigimiit Ella Ø orninneqarpoq, tassanilu Siriusikkunni Qimusseqatigiit 2 taquassaannik mamartortugassaannillu nakkartitsivigineqarlutik.

Qimusseqatigiit 2-t silaannarmit naapinnerat allaaserisamik matuminnga allattup sunnertissutigisorujussuaa.

Uanga nammineq 1993-imiit 1995- imut qimusseqatigiinnut 2-nut qimussimik angalaqataaneq pikkunarluinnartumik misigisaqarfigisimavara. Ella Ø-miit Kaiser Franz Joseph Fjordimi kangerloqarfik alapernaarsuiartorfigineqarpoq tamatumalu kingorna qullarsariarluta

kimmut Kangerlussuup tungaanut uterluta aallarluta. Mittarfimmut uterluareeratta Flemming Hougaard tikilluaqqusivoq, Rene Munchilu peqatigalugu timmisartoq misissorneqarluni hangarimullu eqqunneqarluni.

Tamatuma kingorna ullormut suliarisimasat pillugit oqaloqatigiittoqarpoq taavalu Issittumi Sakkutooqarfimmut nalunaarusiortoqarluni. Timmisartortartoqatigiinni inuttat ilaat kikkut tamarmik innajaartinnagit unnukkorsiutissanik isumaginnissaaq. Tassami timmisartup Challengerip Kalaallit Nunaanni suliassamik aalajangersimasumik isumaginninnissamut qaqugukkut pisariaqartinneqalernissaa ilisimaneqanngisaannarpoq.
Timmisartup naalagaa aqagu ullaakkut makiaariarluni ullormut suliassat isumagineqannginneranni inuttat ullaakkorsiutissaannik iffiussaaq.

Assit ataani takukkit