ilinniagaqarneq
Cater- amma kantineassistentinngortoq nerisassiornermik nuannarisalik
Ilinniagaq siulleq naammanngilaq, maannalu Kim Rasmussen nerisassiornermik ilinniaqqinnialerpoq
Kim Rasmussen Tasiilameersoq, tallimanngormat nerisassiornermik ilinniarfimmi Inuili-mi cater- aamma kantineassistentitut allagartartaarpoq.
Tamanna pivoq ilinniarfiup kantiinaani, tassani forstander Poul Christensen pilluaqqusilluni oqalugiareersoq faglærerip Marie Toftdahl-ip allagartaq tunniuppaa, atuakkamillu tunissutisitillugu.
Kim Rasmussenip ilinniakkami naammassivinnissaanut sapaatit akunnerini sisamani praktikkernissaq suli amigaatigaa, taannali ingerlattariaannaavoq, soraarummeernermini angusilluareerami.
Taamatut ilinniagaqarneq ukiut pingajuata affaanik sivisussuseqarpoq, sisamariarluni Inuili-mi atuartarluni, piffissallu sinnerani praktikkertarluni, ilinniagaqarnerlu naammassereerlugu igaffimmi kantiinamiluunniit pisortanngortoqarsinnavoq imaluunniit neriniartarfimmi ikiortinngortoqarsinnaalluni.
Kim Rasmussen Pituffimmi Thule Air Basemi Greenland Contractorsimi praktikersimavoq, tassaniinnilu nuannarilluinnarsimavaa.
Aperineqarami ilinniagaqarnini naammassiguniuk suliffittaareersimanerluni, Kim Rasmussen akivoq »aap naaggalu«.
–Nerisassanik piareersaaneq nuannarillualersimavara, maannalu igasunngorniarusuppunga, taanna oqarpoq nangillunilu:
– Taamaattumik praktikkernera naammassiinnavikkukku Ilulissani Hotel Arcticimi igasutut lærling-inngussaanga, tamannalu pissaaq juunip naannginnerani.