Carla Sands: Danmarkip Kalaallit Nunaanni illersornissamut tunngatillugu suliani annertusartariaqarpai
USA-p aallartitaqarfianit piumasarineqarpoq, Danmarkip issittumi oqartussaaffigisaminik nakkutilliilluni suliaminik annertusaanissa
Ruslandip Issittumi sakkutooqarnikkut suliaqaraluttuinnarnerata kiisalu Kinap anguniagaasa, amma sakkutooqarnermut tunngassuteqartut, kingunerannik USA-p nassuerutigaa Issittumi suliaqarnerminik annertusaasariaqarluni. USA-p Danmarkimi aallartitaqarfiani ambassadøri Carl Sands, Issittulerngusaanneq pillugu Christiansborgimi folketingip illersornissamut ataatsimiititaliaata aamma peqatigiiffiup Folk og Sikkerhedip ullumi isumasioqatigiissitsinerani oqarpoq.
Danmarkili aamma Issittumi illersornissamut tunngatillugu amerlanerusunik aningaasanik atuisariaqarpoq, taanna taama erseqqitsigisumik oqarpoq.
- Soorlu USA-mi uagut sakkutooqarnikkut piginnaasavut pingaartitavullu iliuuseqarfigissallugit eqqarsaasersuuteqartugut, taava aamma Danmark NATO-milu ilivut allat sunik amigaateqarnerlutik paasiniartariaqarpaat, iliuuseqarfigalugillu, taanna oqarpoq.
Nakkutilliineq
Carla Sandsip pingaartumik sumiiffiup nakkutigineqarnera pineqartillugu sakkortunerusumik iliuuseqartoqarnissaa ujartorpaa.
- Pingaaruteqarluinnarpoq, aarlerinartuusinnaasut eqqorluinnartumik nassaaralugillu suussusersineqarnissaat aamma pisariaqassappat aarlerinartuusinnaasunut iliuuseqarnissaq, tassa aarlerinartut Danmarkip issitumi oqartussaaffiata nunataani, silaannaani imartaaniluunniit atuukkaluarpataluunniit.
Tanna oqarpoq isumasioqatigiinnerit mannatut ittut apeqqutinik oqimaattunik annissinissamut atussallugit eqqortuusut.
- Kalaallit Nunaat Savalimmiullu nunaminnik illersuinissamut naammattunik isumalluutissaqarpat? Danmark imminut illersorniarluni amerlanerusunik aningaasaliisariaqanngila?