Cannabisolie inerteqqutaajunnaarpoq: Suliffeqarfik ataasiinnaq nioqquteqarniarluni qinnuteqarpoq
Naak cannabisolie annerpaamik 0,2 procentimik THC-mik akoqartoq januaarimili inerteqqutaajunnaaraluartoq, pisiniarfinni suli pisiassaalinngilaq.
Naalakkersuisut inatsimmik aqutsinerminni innuttaasut peqqissusaat mianerisussaavaat. Tassami cannabisoliep eqqussorneqarnerata inerteqqutaajunnaarsinneqarneranit innuttaasut peqqissusaannut qanoq sunniuteqassanersoq erseqqissumik takussutissaqanngilaq.
Ilaqutariinnut Peqqissutsimullu ataatsimiititaliaq siorna taama oqariartuuteqarpoq.
Oqaaqqissaarut eqquutinngitsoq paasinarsivoq. Cannabisolie annerpaamik 0,2 procentimik THC-mik akoqartoq, qaammatit pingajuat avillugu matuma siornatigut inerteqqutaajunnaarpoq.
Suliffeqarfiit tamarmik qinnuteqarsinnaasut
Taamaakkaluartoq nuna tamakkerlugu suliffeqarfinni ataasiinnaq cannabisoliemik tuniniaanissamik siunertaqarluni eqqussinissamut Nunatta Nakorsaaneqarfianut qinnuteqarsimavoq.
Naak suliffeqarfik sunaluunniit, akiliisinnaajunnaartutut suliarineqanngitsoq aamma Qitiusumik Suliffeqarfinnik Nalunaarsuiffimmi (CVR) normumik atuuttumik pigisaqartoq 0,2 procent THC ataallugu cannabissimik nioqqutissianik eqqussinissamut akuersissummik qinnuteqarnissamut periarfissaqaraluartoq.
Peqqissutsimut naalakkersuisoq, Mimi Karlsen (IA), Inatsisartunut ilaasortamut Mariia Simonsenimut (IA) taama ilisimatitsivoq. Mariia Simonsenip oqarnera naapertorlugu, uuliap pisiarineqarsinnaalernissaanut amerlasuut qilanaarsimapput, kisianni naammagittarlutik utaqqisariaqarput.
Inatsit malillugu innuttaasut assersuutigalugu Danmarkimi cannabissimik piseriarlutik eqqussinnaanngilaat. Innuttaasut taarsiullugu taakku nunatsinni pisiarisassavaat, nioqqutissallu taamaallaat suliffeqarfinnit ingerlatseqatigiiffinnillu nioqqutissanik nunatsinnut eqqussinissamut akuersissuteqartunit pisiarineqarsinnaapput.
Tamanna maanna periarfissaanngilaq.