Cannabis inerteqqutaajunnaarsinneqarpat qanoq pisoqassava: Tuniniaasitsisartut akillutik periarnissaat
Politikerit cannabis qanoq pissanersoq aalajangiitinnatik suliaq sukumiisumik misissoqqaarumavaat. Siorna ikiaroornartumut attuumassuteqartumik nalunaarutiginninnerit ukiuni 20-ni amerlanerpaartaat politiinut nalunaarutigineqarsimapput.
Siunissami cannabisip inerteqqutaajunnaarsinneqarnissaanut pilersaarummik akuersissutiginnittoqassappat tuniniaasitsisartut niuerfinnik nutaanik ingerlataqalissappat? Eqqarsaat tamanna politikerinnit arlalinnit ernummatigineqarpoq.
Tuniniaasitsisartut soqutigittaatsuusutut oqaatigaat.
Aviisi AG taama allaaserisaqarpoq.
- Eqqarsarnarluni cannabis aqutamik tuniniagaalerpat aningaasarpassuarnillu tuniniaatitsinermit isertitaarukkunik suna alla saassavaat. Qularnanngilarmi aningasanik amerlasuunik atugaqarluni inuuneq qimakkuminaatsillugu isertitassanik allanik ujartuinissaat. Ikiaroornartoq sakkortuneq? Kissaatiginanngeqaat, soorunami aamma qulakkeerlugu taamaakkumaartoq oqaatigisinnaanngilarput, Sunali tamaat eqqarsaatiginiarsarisariaqarparput, IA-mi peqqissutsimut tunngasuni oqaaseqartartoq, Agathe Fontain, Inatsisartuni oqarpoq.
Oqallinnermut aallaaviupput Kristian Jeremiassenimit (IA) aamma Aqqlu Jerimiassenimit siunnersuutit marluk, ajornartorsiutinik cannabisip inuiaqatigiinnut pilersitaanik inerteqqutaajunnaarsitsisoqaraluarpallu tamatuminnga allanngortitsisinnaaneranut tunngassuteqartut.
Kisitsisit politidirektørimit Bjørn Tegner Bayimit pisut ilimanarsisippaat, kaaviiaartinneqartartut amerlasoorujussuusut:
- Inatsisinik unioqqutitsinerit ikiaroornartumut attuumassuteqartut 2022-mi ukiuni 20-ni nalunaarautigineqartut amerlanerpaaffeqalersimapput. Inatsisinik unioqqutitsinerit ikiaroornartumut attuumassuteqartut 584-it nalunaarsorsimavavut, aamma ilanngaaserisut peqatigalugit ikiaroornartoq hash katillugit 129,68 kiilu arsaarinnissutigisimavarput.
Allaaserisaq tamaat AG-mi saqqummertumi kingullermi atuaruk. Uani isissutissarsigit:
