Canadamut pilerisaariartortut: 'Avannaa Arctic Gamesimut' qaaqqusisut
Avannaata Kommunia timersornikkut unammisitsinermik angisuumik aaqqissuussinikkut ukiuunerani takornariartitsisarneq taperserniarpaa. Unammisitsineq pilersaarutit malillugit siullermeerluni mittarfissuup nutaap ammarnerata kingorna 2025-mi ingerlanneqassaaq.
Timersornikkut unammisitsineq angisooq inuit nunaannit allanit Issittumeersunit peqataaffigineqartoq Ilulissani suliassaqartitsissaaq.
Piffissamimi tassani illoqarfiup akunnittarfiini inerpassuit inoqartinnissaat pisariaqarmat, borgmesteri Palle Jerimiassen, Canadami Wood Buffalomit taama oqarpoq, tassani maanna Arctic Winter Gamesimut suliniut nittarsaappaa:
- Unammineq nutaamik mittarfittaarnitta 2025-mi pissaaq, tassani ilaatigut Nunavut, Nunavik aamma Alaska Avannaa Arctic Gamesimut qaaqquagut, taanna oqarpoq, nangillunilu:
- Ukiuunerani takornariartitsineq siuarsarniarlugu aamma naggueqatitta akitsinniittut qaninnerulernissaat anguniarlugu tamanna pissaaq. Suliniut soqutiginartorujussuuvoq.
Pitsaasumik tiguneqartoq
Borgmesterip oqarnera naapertorlugu timersortartut arctic sportsimi AWG assigalugu unammissapput, timersornikkut unammisitsineq ukioq allortarlugu januaarip naanerani imaluunniit februaarip aallartinnerani pisassasoq pilersaarutaavoq.
- Pingasunit pitsaasumik akineqareerpugut, tassa Nunavik, Nunavut og Alaska, Palle Jerimiassen oiqarpoq.
Aaqqissuussaq kommunip pisartussanik pilersaarusiorneranut taanna ilaavoq.
Silap pissusia pillugu ataatsimeersuarnerit misissorneqassapput
- Aalborg Kongresscenter ukioq allortarlugu piniarnermut aalisarnermullu tunngasunik saqqummersitsisarnermik isumaqatigiissuteqarfigaarput. Arctic Sport ilannguneqassaaq, tassanilu aamma saniatigut kulturimut tunngasunik aaqqissuisoqartassalluni, Palle Jerimiassen oqarpoq, nangillunilu:
- Tamatuma saniatigut Aalborg Kongrescenter suleqatigalugu silap pissusia pillugu ataatsimeersuarnernik aaqqissuisarnissamut periarfissat misissorniarpagut. Piffissamilu akunnittarfiit inoqarpallaannginnerini inoqarnerunissaannut suliniuteqaleruttorpugut.