Canadamiit arlallit nunatsinnut filmfestivaleriartut
Nuuk International Film Festival ullumikkut aallartittussaq canadamiunit arlalinnit peqataaffigineqalerpoq. Canadameersoq nunat tamalaat akornanni nersornaaserneqarsimasoq filmfestivalimut peqataasunut ilaavoq.
Nuuk International Film Festival, NIFF, Katuami ullumi nal. 18.30 allartissaaq, filmi takuteqqaarneqartussaq "Bootlegger" canadamiumit Caroline Mannotsimit ammaanersiornermi takutinneqassalluni. Filmfestivali arfinilissaat ingerlanneqartussaavoq, akilinermiullu aatsaat taama amerlatigisut peqataassallutik.
NIFF-ip aaqqissuisui tusagassiorfinnut nalunaaruteqarlutik taama ilisimatitsipput.
Nunavumiit filmiliornermik suliaqartut pingasunngornermi ualikkut timmisartumik attartukkamik ilaallutik Nuummut tikissapput, filmfestivalimullu peqataassallutik. Nunavumit peqataasut amerlanerunissaannut najukkami filmiliornermik suliaqartut, Nunavut Film Development Corporation, suleqatigalugit iluatsissinnaasimavoq.
Nuimasumik tikeraartoqarneq
Nuuk International Film Festivalimi aaqqissuisut nuannaarutigaat filmilianik suliaqartartoq nersornaaserneqarsimasorlu, Zacharias Kunuk, Nunavumiit tikeraartussanngormat.
Zacharias Kunuk nunat tamalaat akornanni Cannesimi filmfestivalimi 2001-imi Camera D'or-imik nersornaaserneqarpoq "Atanarjuat: The Fast Runner"-imik suliaqarnini pillugu.
- Aallarteqqaarattali Zachip (Zacharias Kunuk, aaqq.) tikeraarnissaa takorloortuaannarsimavarput, festivalimi pisortaq Pipaluk K. Jørgensen oqaluttuarpoq.
Pingajussaanik iluatsittarpoq
Pipaluk K. Jørgensen ilisimatitsivoq filmiliortartup tikeraarnissaa siornatigut marloriarluni iluatsinngitsoorsimasoq. Siullermik 2017-imi tikeraartussaasimagaluarpoq, filmiliaa ”Maliglutit/Searchers” NIFF-imi takutinneqarmat. Aappassaanillu 2020-mi tikeraartussaasimagaluarluni, coronalli tuniluunnera pissutigalugu Nuummut tikissinnaasimanani.
- Inuit Nunangani filmiliortartut allat Zacharias Kunuttulli sunniisinnaassuseqartiginngillat – tamatsinnut sunniuteqarsimatigaat. Taamaammat Nuummut tikeraalernera pingaaruteqartorujussuuvoq, oqarpoq.
Zacharias Kunuup filmiliaa kingulleq ”The Shaman’s Apprentice” arfininngornermi 17. september nalunaaqutaq 13.30 takutinneqassaaq, filmiliortorlu suliani pillugit kingusinnerusukkut oqaloqatigineqassalluni.
Nunatsinniit filmimik takutitseqqaarneq
Filmfestivalimi nunatsinnit filmi annilaammisaarnartuliaq "Alanngut Killinganni" Malik Kleistimit suliarineqarsimasoq takuteqqaarneqassaaq. Filmi festivalimi kingullersaalluni takutinneqassaaq, arfininngornermi nal. 18.30.
"Alanngut Killinganni" filmimut "Qaqqat Alannguani"-mut malittaavoq. Filmi siulleq nunatsinni takuneqarsimanerpaavoq, 19.000-init amerlanerusunit takuneqarsimagami.
Canadamit filmit allat takutinneqartussat tassaapput Caroline Monnetsip filmiliaa ”Bootlegger”, Nyla Innuksuup filmiliaa ”Slash/Back” kiisalu isiginnaagassiat naatsut”Nalujuk Night” aamma ”Nothern Haze”.
Nuuk International Film Festivalip nittartagaani pisussat tamakkerlugit takusinnaavatit.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...