Canadami najugalik Rikke: ATV-nik angalaqattaartarpugut
Mulle Canadami ukiuni aqqanilinni najugaqareerpoq. Najugaqarfigisaa immamut ungasikkaluartoq najugaqarfigisani nuannarilluarpaa
Rikke Møller Nichols (Mulle) Canadami Saskatoonimi najugaqarpoq. Najugaqarfiat immamut ungasikkaluartoq eqqaminni taseqarpoq, taanna uinilu ornigarluartarpaat.
- 270.000-nik innuttaassusilimmi Saskatoonimi najugaqarpugut. Biilinik angalaarluartoqarsinnaavoq. Aasakkut ornittakkatsinnik najugaqarfeqarpugut, aputeqarluartumi juullisiortarluta. Maani Kangerlussuartut nillertigisumik ississinnaasarpoq, qujanartumik sungiunnikuuara.
Rikke Møller Nichols, nuummiuuvoq, naqiterivimmi atorfeqarpoq, Saskatoonimut ukiut aqqanillit matuma siorna nuulluni.
- Uera pissutaalluni maannga nuuppunga, maanna katinnikuuvugut. 2009-mi katippugut.
Imaq ikinngutillu
Canadami oqaatsitigut ajornartorsiuteqanngilaq, inuuniarnerup tungaatigut aamma sungiussinikuulluni. Nunatsinnut angerlarnissamut naatsorsuuteqanngilaq. Canadamit Kalaallit Nunaannut angalaniarneq erloqigisarlugu oqarpoq.
- Ikinngutikka, ilaquttakka imarlu maqaasisarpakka. Nuup aqquserngitigut pisutsilluni ilassiortarnerit maqaasisinnaasarpakka. Angerlarsimasutut misigineq, pinngortitaq, raajatorneq assingiinngitsullu allarpassuit maqaasisarpakka. Nuummut angalaneq akikitsuinnaanngilaq, tamanna uggornartarpoq.