Skip to main content

Canada: Canadamiu Kinami tigummigallarneqarpasittoq

Huaweip aningaasaqarnermut pisortaata Canadami eqqartuunneqarnerata nalaani, Canadamiu Kinami tigummigallarneqarpoq

Canadamiu ataaseq alla Kinami tigummigallarneqannguatsiarpoq. Canadami nunanut allanut ministeri, Chrystia Freeland, pingasunngornermi unnukkut tusagassiortunik katersortitsinermini taama oqarpoq.

- Canadamiu taama pineqarsimasoq paasivarput, taanna uagutsinnut saaffiginnimmat oqarlunilu kinamiut oqartussaasuinit apersorneqarsimalluni, ministeri oqarpoq.

Nunanut allanut ministerip paasissutissat saqqummiussai killeqarput, Canadalli oqartussaasuisa pisumik ilisimannilereernerisa kingorna angut saaffiginnittoq attavigineqarniartarsimagaluartoq iluatsinneqarsimananili ilanngullugu oqaatigalugu.

- Sumiiffia qulakkiissallugu ilungersorluta sulivugut, pisorlu pillugu Kinami oqartussat oqaloqatigereerpagut, Chrystia Freeland nassuiaavoq.

Pisup siualiani Canadamiut diplomatiat Michael Kovrig Kinami tigummigallarneqarpoq.

Taama pisoqarpoq Canadap Kinallu akornanni pissutsit erloqinarsigaluttuinnarneranni.

Taamaattoqarneranut pissutaavoq Huaweip Kinami aningaasaqarnermut pisortaa, Vancouverip mittarfissuaniitsilluni Canadami oqartussaasunit sapaatip akunnerata siuliani tigusarineqarmat.

Meng Wanzhou qularnaveeqqusiinerup kingorna marlunngormat iperarneqarpoq, februaarilli arfernani eqqartuussivimmiissaaq, taassumalu tungaanut isikkamigut kalunneqartinneqassalluni.

USA-p Canada qinnuigaa aningaasaqarnermut pisortaq USA-mut tunniuteqqullugu, pisortarmi Iranimut iliuutsit unioqqutillugit iliorsimasutut pasineqarmat.

Taama piumasaqarneq Kinamit kamaatigineqarpoq, USA-llu Kinallu akornanni pissutsit sukannernerulersillugit. Tunniussinissamut suliaq suli naammassineqanngilaq.

Pisut pineqartut imminnut ataqatigiinnersut suli ilisimaneqanngilaq. Malinnaasulli arlallit isumaqarput, nunat pineqartut pingasut akornanni aaqqiagiinngittoqarnerani diplomatiusimasoq Michael Kovrig sussuteqanngitsoq tiguarneqarsimasoq.

- Qularisassaanngilaq kinamiut naalakkersuisuisa canadamiut naalakkersuisui sakkortunerpaamik kimigiiserfiginiaraat, Beijingimi canadamiut ambassadørerisimasaat, Guy Saint-Jacques, oqarpoq.

Meng Wanzhou, 46-nik ukiulik, USA-p piumasaqarnera malillugu Vancouverip mittarfissuani decembarip aallaqqaataani tigusarineqarpoq. 

Eqqartuussisoqarnissaa siunertaralugu tigusarineqartoq tunniunneqassasoq USA piumasaqarpoq.

Tigusarineqartoq arnaq Huaweimik pilersitsisup panigaa. Huawei nunarsuarmi attaveqaatitigut suliaqartut annersaraat nunarsuarmilu smartphonesiliortunik suliaqartut annersaat tulliulluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER