Canada Nunavumi sakkutooqarfimmik 2024-mi ammaaniarpoq – ukiunik qulingiluanik kinguaattooqqalluni
Sakkutooqarfik nutaaq Canadap Issittumi kisimiilluni naalagaanermik atortitsineranut atorneqartussaq, ukiorpassuarni kinguaattooqqalluni aappaagu ammarnissaa naatsorsuutigineqarpoq.
Canadami naalakkersuisut ukiorpassuarni Nunavup avannarpasissuani sakkutooqarfimmik anginngitsumik pilersitsiniarluni suliniuteqarput.
Sakkutooqarfik Canadami sakkutuut umiarsuaannut orsertarfiullutillu Issittumi kisimiilluni naalagaanermik atortitsinermut atorneqassaaq.
Canada ilaatigut Issittumi nunatarujussuaqarpoq, aamma Qalasersuup eqqaani immap naqqanik piginnittuunermut Danmark Ruslandilu assigalugit FN-imut piumasaqaateqarnikuuvoq.
Sakkutooqarfik 2024-imi ammarsinnaasoq, Canadami illersornissamut ministereqarfiup maanna naatsorsuutigigaa, Canadami tusagassiorfik CBC News allappoq.
Mittarfik taamaatinneqartoq
Tusagassiorfik naapertorlugu piffissamut pilersaarummut tunngatillugu suliniut ukiunik qulingiluanik kinguaattooqqavoq, pilersaarutillu nalunaarutigineqarnerannit ammaaneq ukiut 16-it qaangiuttut pissaaq.
Sakkutooqarfik Baffin Islandimi Nanisivimmi piiaaffimmi matoqqasumi inissisimassaaq. Mittarfiup tassaniittup iluarsartuunneqarnissaa pilersaarutaasimagaluarpoq. Aningaasaqarnerlu eqqarsaatigalugu mittarfik suliniummut ilaajunnaarsinneqarpoq.
Canadami illersornissamut tunngasunik oqaaseqartartup oqarnera naapertorlugu, piffissat sanaartorfiusut pingasut sivikereersut – coronap nunarsuaq tamakkerlugu tuniluunneranit sunnerneqarsimaneranik kinguaattoornerit ilaatigut pissuteqarput.
CBC-p ilanngutassiaa naapertorlugu, Nanisiviup aamma illoqarfiup Arctic Bayip akornanni aqqusernup upernaakkut 2021-mi kuussuarmit eqqugaasimanera aamma sunniuteqarpoq.