Campus Kujalleq: Adventure guidetut naammassisut aatsaat taama amerlatigisut
Qaqortumi Campus Kujallermi pingasunngorpat tulliani adventure guidetut naammassisut nutaat 18-it allagartartaassapput. Taakkua ilinniarnertik 2016-imi aallartippaat.
Pingasunngorpat tulliani Campus Kujallermi persuarsiortoqassaaq, Kalaallit Nunaat takornarialerinerup iluani pisuunnguallattussanngormat.
Adventure Guidetummi ilinniartut 18-it allagartartaartinneqassapput.
- Ilinniaqatigiinni tamani ukioq manna nukittuumik inissisimavugut. Qaqortumi aallartikkamik Kangerlussuarmukarput Sisimiunukarlutillu, Qaqortumullu uteqqipput ilinniagartik naammassiartorlugu, Rie Oldenburg, Campus Kujallermi ilinniartitaanermut pisortaq, tusagassiutinut nalunaarummi allappoq.
Ilungersornartulik
Adventure guidenngortussat misilitsinnerminni angusarissaarsimapput. Ilinniaqatigiit agguaqatigiisillugu karakteri 8.4 angusimagaat, ilinniarfik paasissutissiivoq.
- Kalaallit Nunaanni ilinniakkani ajornarnerpaat ilaat naammassilerpaat. Adventure guidenngorniarneq timikkut eqqarsartaatsikkullu ilungersornartoqarpoq ullullu takkajaajusarlutik. Suliarpassuit timimillu aalatitsinerpassuit, Rie Oldenburg oqarpoq.
Siuariarneq
Campus Kujalleq majimi adventure guidenik 13-inik allagartartaartitsivoq.
- Campus Kujalleq aallartinnerminiit maanna takornarialerinerup iluani 200-ngajannik naammassititsilerpoq. Piumaneqarnerat qaffasippoq, takornarialerisuniit takornarianiillu. Taamaattumik maannakkut Campus Kujallermiit ukioq manna ilinnialersussat nutaat qilanaarutigaagut, Rie Oldenburg oqarpoq.