Skip to main content

Camillap specialiliani akissarsissutigaa

Nunatsinni oqaatsit pillugit oqallinneq pillugu inaarutaasumik allaaserisani Ilisimatusarfimmi ilinniartup Camilla Kleemann-Andersenip akissarsissutigaa.

33-nik ukiullip Camilla Kleemann-Andersenip Ilisimatusarfimmi Oqaasilerineq, Atuakkialerineq Tusagassiuutilerinermilu inaarutaasumik allaaserisani ukioq manna tunniuppaa. Tunniunnerata nalaani Savalimmiuni, Kalaallit Nunaanni Danmarkimilu naalagaaffeqatigiinnerluunniit pillugit immikkut sammisallit kandidatinngorniat unammisinneqarput.

Camilla Kleemann-Andersen Nunatsinnit ajugaasuuvoq, akissarsiani marlunngormat tiguaa.

Namminersortuuneq ukiuni qulini

- Allaaserisama qulequtaraa 'Plastic Flowers and Tongue-less Greenlanders - Feelings in the Language Debate in 2009-2019', tassa Namminersortunngoreernerup kingorna oqaatsit pillugit Nunatsinni oqallinneq, Sermitsiaq.AG-mut oqarpoq.

Oqallinnerni suut initunerpaasarsimanersut allaaseraa.

- Oqallinnermi misigissutsinut tunngasortai soqutigigakku allaaseraara, misigissutsit atugarineqartut eqqartorneqarneq ajortut misissorlugit. Suliaralugu pissanganarpoq, tassami ineriartortoqarpoq, innuttaasut piumasaqalerlutik kalaallit oqaasii pisortatigoortumik oqaasiussasut, Camilla Kleemann-Andersen oqarpoq.

Ph.d.-mik allaaserinnissaaq

Oqaasilerinermi, Atuakkialerinermi Tusagassiuutilerinermilu maanna kandidatiuvoq, oqaatsigullu sammissallugit soqutigisaralugu.

- Oqaatsigut kinaassutitsinnut ilaasorujussuupput, inuusuttuaraallungali sammisaq soqutigilernikuuara. Oqaatsit pillugit sakkortuumik oqallittoqarsinnaasarpoq, kisianni aamma sumiorpaluutit assigiinngitsorpassuupput, tamakkulu soqutigisaraakka. Ph.d.-mik allaaserinninnissara eqqarsaatigaara.

- Naluara qaqagu taanna aallartissanerlugu, kisianni oqaatsit pillugit suliaqarnissara naatsorsuutigaara, tassani oqaatsitta inissisimaffiat allaaserissallugu takorloorpara, Camilla Kleemann-Andersen oqarpoq.

Taanna tassa marlunngormat akissarsitinneqarpoq, 40.000 koruuninik tunineqarluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER