Californiami nunap sajunnera annertooq Las Vegasimi sajuppillatsitsisoq
Ulluni marlunni tulleriinni USA-mi Californiami tallimanngornermi sumiiffimmi nalunaaqutaq malillugu unnukkut nuna sajorujussuarpoq.
USA-mi Californiami sumiiffimmi nalunaaqutaq malillugu tallimanngornermi unnukkut nuna sakkortuumik sajuppoq, naalagaaffinnilu naalagaaffeqatigiinnut ilaasuni allani aamma Mexicomi malugineqarsinnaasimavoq.
Amerikami geologit misissuisarfiata (USGS) nunap sajunnera 7,1-imut naatsorsorpaa. Naalagaaffimmi naalagaaffeqatigiinnut ilaasumi nunap sajunnera ukiuni qulikkaani marlunni aatsaat taama sakkortutigisumik sajuttoqarpoq.
Nunap sajunneranut taama annertutigisunut Californiami piareersimasoqarpoq, tamakkulu ukiut arlaqanngitsukkaarlugit pisinnaapput. Søren Gregersen, GEUS-imi professor Emeritus, taama oqarpoq.
- California nunap sajuffigisartagaraa, taamaattumik nunap sajunnissaanut taama annertutigisumut oqartussat piareersimapput. Ukiut arlaqanngitsukkaarlugit nunap sajunnera 7,0-imut imaluunniit annertunerusumut Californiami uuttuisoqartarpoq.
- Illut nunap sajunnissaanut tulluarsarlugit sanaajupput. Illut nakkaanissaannut sajunnerit sakkortunerusariaqarput – 7,5 aamma 8,0-ip missaaniillutik, taanna oqarpoq.
Sakkortuumik sajuttoqaraluartoq inunnik ajunaartoqanngilaq, aamma illunik annertuumik aserortoqanngilaq, nutaarsiassaqartitsivik AP oqartussat naapertorlugit taama paasissutissiipput.