Nuummi bussit unittarfii atuuttut ajornartorsiutinik pilersitsisarput. Nalinginnaasumik illuaqqat qalipaatinik serlersaarfigineqartarput, angalaffissat piiaarneqartarput aamma iikkat quiffigineqartarlutik.

Tamakku tunngaviupput Sanarfinermut Avatangiisinullu Ingerlatsiviup illuaqqanik arfinilinnik assigiinngitsunik angissusilinnik isikkulinnillu pisisoqarnissaanik, taakkulu issittumi silaannarmut naleqquttuunersut misilerarneqarnissaannik politikkerinut innersuussuteqarneranut.

- Illuaqqat LED-nik qullilersorneqassapput, aammalu ilaasut toqqissimanerulernissaat ingerlatitsisullu malinnaalluarnissamut periarfissaqarnerunissaannut siuarsaataassallutik, ingerlatsivimmi pisortaq Hans Henrik Winther inassuteqaammini, decembarip qulingani Inuussutissarsiornermut Aningaasaqarnermullu Ataatsimiititap ataatsimiinnerani akuerineqartumi allappoq.

Ingerlatsiviup Nuup Nussii unittarfiit maanna atuuttut ajornartorsiutaasarneri pillugit oqaloqatigisarsimavaa, bussillu unittarfii assigiinngitsut marluk angissutsimikkut assigiinngitsut, assartorneqarnissaat, ikkussorneqarnissaat pisiaqarnissarlu ilanngukkaanni én million koruunit inorlugit akeqartussatut missingerneqarsimapput.

Bussit unittarfiata Nuummi misilerarneqartussap aappaa imatut isikkoqarpoq

Kommuneqarfik Sermersooq

Bussit unittarfii taakku assigiinngitsut marluk taaguutigaat Moment aamma Træmiljø, taakkulu Norgemi sanaajupput.

qanoq sivisutigisumik suliarineqarnissaat assartorneqarnissaallu apeqqutaalluni illuaqqat Nuummut apuuteriarpata ikkussuunneqarumaarput.

- Illuaqqat sumiiffinnut anorlernerpaaffiusartunut aputeqarneranilu apiffiunerusartunut inissinneqassapput, silap pissusaanut qanoq naleqqiullugit qanoq attartutiginersut misileraaffiginiarlugit, kommunimit ilisimatitsissutigineqarpoq.

Ilanngullugu aamma oqaatigineqarpoq illuaqqat nutaat ajornannginnerusumik eqqiarneqarsinnaassasut, illuaqqammi maanna atuuttut eqqiaruminaassinnaagamik.

Nutaarsiassat

Utoqqaat ukiortaarsiortinneqartut

Pisarneq malillugu Tasiilami Najukkami Ataatsimiititaliap aaqqissuussaanik illoqarfiup utoqqartaat ukiortaarsiortinneqarput.

Harald pulaarpoq

Borgmesterip tullersortaata aappaa, Harald Bianco, Tasiilami ikiorsiisarnermut aaqqiissutit assigiinngitsut ulluni makkunani alakkallattaavai.