Danmark
Bruxellesimi peqqarniisaartoqarnerata kingorna Københavnimi politeeqarnerusoq
Bruxellesimi qaartartumeerisoqarnerata kingorna, Københavnimi piffiit ilaanni politiit marlunngornermi takussaangaatsiassapput
Bruxellesimi arlalinnik qaartartumeerisoqareersorlu, qallunaat politiivisa marlunngornermi aqqusinerniinnertik annertusiniarpaat.
Københavnimi Politiit Twitterikkut taama ilisimatitsipput.
- Bruxellesimi pisut malinnaaffigaagut. Taamaattumik mittarfimmi aamma Københavnimi piffinni pingaarnerni politiit naapinneqarnerusinnaasapput, politiit allapput.
Malinnaaffigeqqissaaraat
Politiit isertortumik paasiniaasartui (PET) Ritzauimut oqarput, belgiami illoqarfiit pingaarnersaanni pisut malinnaaffigeqqissaarneqartut. PET maannamut oqaaseqaqqissinnaanngikkallarput.
Naalagaaffiup politiivinit aamma taamatut nalunaaruteqartoqarpoq.
- Nunami naapiffiusuni assigiinngitsuni aqqusinerni politiit naapeqattaarnerulissavatit. Qanoq pisariaqartitsisoqarnersoq nalilersuisoqarpoq, attaveqatigiinnermut siunnersorti Thomas Kristensen ilisimatitsivoq.
Nakkutilliineruneq
Københavnip mittarfia nittartakkamini aamma ilisimatitsivoq, politiit mittarfiullu sillimasuisa Bruxellesimi qaartartumeerisoqarnerata malitsigisaanik sillimaniarneq annertusineqartoq.
Aamma Københavnimit Bruxellesimut timmisartuussinissat maannamut taamaatinneqarallarput, angalasullu mittarfiup nittartagaatigut cph.dk-mi malinnaaqquneqarput.
Billundimi aamma mittarfimmi marlunngornermi immikkut misissuisoqarpoq, pisortaq Kjeld Zacho Jørgensen oqarpoq.
Sillimaniarneq annertusisaq
Nutaarsiassaqartitsivik AFP naapertorlugu, Europami mittarfinni arlalinni sillimaniarneq aamma annertusineqarpoq.
Taakku mittarfiit ilagaat, Frankfurt aamma Parisimi mittarfik Charles De Gaulle.
Atuaruk: Bruxellesimi peqqarniisaartoqarnerani ikinnerpaamik 34-t toqunneqarput
/ritzau/