Bruxellesimi peqqarniisaartoqarnerani ikinnerpaamik 34-t toqunneqarput

Belgiap illoqarfiisa pingaarnersaanni Bruxellesimi marlunngornermi peqqarniisaarniartoqarnera, inuit 26-it inuunerannik maannamut naleqartitsivoq.

Nutaarsiassaqartitsivik Reuters naapertorlugu, mittarfimmi Zaventemimi ikinnerpaamik aqqanillit toqunneqarput. Tassani marloriarluni qaartitsisoqarpoq, ataaseq aallariartortarfimmi qaartinneqarpoq.

Metrortarfik qaartartumeerneqartoq
Taassuma saniatigut ikinnerpaamik 15-it Maelbeekimi metrortarfimmi, EU-p qullersaqarfianut ungasinngitsumi toqunneqarput.

Mittarfimmi qaartartumeerineq nalunaaqutaq 08.00 tikinngilaaraa tassani pivoq, metrortarfimmilu qaartartumeerineq nalunaaqutaq 9.25 missaani pivoq.

Belgiamiut tusagassiorfiata VRT-p mittarfimmi saassussinermi ikiligaasut ikinnerpaamik 81-iunerarpaat, metrortarfimmilu saassussisoqarnerani ikiligaasut The Guardian naapertorlugu 55-iunerarpaat.

Qimuttuitsuni qaartartoq
Maannamut paasisat naapertorlugit metromi qaartartoq qimuttuitsumi metrortarfimmut apuuttumi qaartinneqarpoq.

Mittarfimmi Zaventemi ilaasut aallariartortarfinnit annilaarlutik qimaammata annertuumik paatsiveeruttoqartoq, franskit nutaarsiassaqartitsiviat AFP aallappoq. Illorsuarmit pujoq qernertoq aniavoq. Igalaat sequmeqqapput, aamma qaliap ilaa nakkarsimavoq.

Illorsuup silataani inuit ikilerneqarsimasut tulleriaapput, ambulancellu takkunnissaata tungaanut annaassiniaasartut ikiueqqaarput.

Imminoriaatigaluni qaartartumeerisoq
VRT naapertorlugu mittarfimmi minnerpaamik qaartartoq ataaseq imminuutigaluni qaartartumeerisartumit qaartinneqarpoq.

Takunnittut belgiamiut nutaarsiassaqartitsivianut Belgamut oqaatigaat, qaartitsisoqarneranut atatillugu igittoqarpallattoq, araberisullu nilliarpaluttoqartoq.

- Qaarpallattoq tusaavarput, naqitsineranillu tunuaallatsinneqarluta, franskeq ilaasoq AFP-mut oqaluttuarpoq.

Taassuma ilanngullugu oqaatigaa, inuit ikilerneqarsimasut takusimallugit.

- Siullermik politiinit uninngaqqusaagaluarpugut. Kingorna illorsuaq qimassagipput nalunaarfigaatigut.

Pinerliiniartoqarneranik sillimaniarneq
Belgiami nunamut tunngasuni ministeri, Jan Jambon, pinerliiniartoqarneranut sillimaniarneq 3-mit qaffasinnerpaamut 4-mut inissinneqartoq nalunaarpoq.

Ambulancet aamma politiit pisoq nakkutiginiarlugu ulapinneranni oqartussat kikkut tamaasa sumiiffiminni uninngaqquaat.

Angallanneq matuneqartoq
Inuit tamarmik angallavii tamarmik matuneqarput.

- Bussit, sporgvognit aamma metro matuneqarput, STIB angallatsitsisuusoq nalunaaruteqarpoq.

EU-Kommissioni sulisuminut angerlarsimaannaqqusilluni nalunaarpoq.

Europami mittarfeqarfiit arlallit isumannaallisaarneq annertusillugu nalunaarutigaat.

Bruxellesimi peqqarniisaarniarnerit illoqarfiit pingaarnersaanni ulluni ulapiffioreersuni pipput. Tallimanngormat Salah Abdeslam, siorna Parisimi novembarip 13-ani peqqarniisaarniartoqarneranut atatillugu ujaarineqartoq tigusarineqarpoq.

Parisimi peqqarniisaarniartoqarnerani inuit 130-t toqunneqarput.

Abdeslam franskisut innuttaassuseqarpoq, kisianni Belgiami inunngorpoq Maelbeekimilu ullumi qaartartumeeriffiusumi najugaqarluni.

Tassanilu aamma nunasisut najugaqarfissuanni Maelbeekimi, tallimanngormat tigusarineqarpoq.

Marlunngornermi ullaap tungaani qaartartumeerinerit amerlasuunik toqutsinerit ikiliinerillu akisussaaffiginerarneqanngillat.

/ritzau/