Brugseni nutaamik siulittaasortaartoq

Kalaallit Nunaanni Brugseni (KNB) maajip naanerani ileqquusumik ataatsimeersuarpoq. Mogen Fontain Qaqortumeersoq siulittaasunngortoq, Nuka Mette-Maria Larsen siulittaasup tulliatut toqqarneqarpoq.

Mogens Fontain Qaqortumeersoq KNB-p siulersuisuunerani siulittaasunngorpoq. Brugseni Qaqortumi peqatigiiffilerinermik ukiorpassuarni misilittagaqarpoq.

Mogens Fontain Qaqortumeersoq Kalaallit Nunaanni Brugseni maajip 28-ani Ilulissani ileqquusumik ataatsimeersuarmat siulersuisunit siulittaasunngorpoq.

Nuka Mette-Marie Larsen Nuummeersoq siulittaasup tulliatut atuutilerpoq. Taamaalilluni atuuffiit marluk taarserneqarput, Kalaallit Nunaanni Brugsenimit (KNB) tusagassiorfitsigut nalunaaruteqarnermi ilisimatitsissutigineqarpoq.

- Brugseni suliffeqarfittut Kalaallit Nunaannut pingaaruteqarpoq, suliffeqarfillu ingerlalluartuaqqullugu avatangiisillu allanngorartuartut malillugit ineriartoqqullugu sapinngisannik iliussaanga. Pingaartitat suliffeqarfiup tunngavigisai tutsuigaakka, siunissamilu sammivissiueqataanissara qilanaaraara, siulersuisunut siulittaasortaaq Mogens Fontain oqaluttuarpoq.

Taanna ukiorpassuarni illoqarfimmi najukkanimi Qaqortumi Brugsenimi peqatigiiffilerinermik suliaqartarsimavoq, misilittakkamilu nuna tamakkerlugu suliami atornissaannut qilanaarluni.

Workshoppertitsineq qinersinerlu

Brugseni najukkani immikkoortortaqarfinni tamani ilaasortaminut apriilimi qinersisitsisimavoq.

Ilulissani maajip naanerani ataatsimiinneq qinersisoqarneraniit ataatsimiinnerit siullersaraat, tassani inuit katillutik 53-it Hotel Arcticimi katersuussimapput. Siulittaasussamik qinersisoqannginnerani ulluni marlunni workshoppertitsisoqarsimavoq, tassani Brugsenip naleqartitai pillugit tamanut saqqummiussisoqarluni.

Maajip 26-ani 27-anilu siulersuisunngortut workshoppertitsisimapput, tassani FN-ip nunarsuarmi anguniagaat nr. 17 Brugsenip suliaqarnerani ukkatarineqarlun.

- Ukiuni qaangiuttuni KNB-mi pisortartatta ilarpassui pisortatut ilinniarfitsinni Brugseni ”Suugaq”-mik taasatsinni ilinniarsimapput. Ilinniakkami tamatumani tatigeqatigiilluni attaveqatigiilernissamik tamatumalu qanoq attannissaanik assigiinngitsutigut ilinniartinneqarpugut, ilinniakkavullu taakkua ilaat workshoppimi peqataasut ilarpassuisa siullerpaamik naapeqatigiiffianni Brugsenimilu peqatigiiffilereqataaqqaarfianni atorneqarput, Benny Reffeldt Otte, Sulisoqarnermut, Attaveqatigiinnermut Pilerisaarinermullu pisortaasoq oqaluttuarpoq.

Piffissami aggersumi maannakkut siulersuisunut ilaasortaasut siulersuisunut ilaasortassanik marlunnik allanik toqqaassapput, taakkua piginnaasaannik pikkorissarfissaannillu misissueqqissaareerlutik. Kingorna siulersuisut katillugit arfineq-marlunnik ilaasortaqalissapput.

Powered by Labrador CMS