agguagarsititsineq

Brugseni aatsaat taama millioninik amerlatigisunik agguagarsititsivoq

Brugsenimut ilaasortanut ukiumoortumik agguagarsiassanik tallimanngormat agguaasoqarpoq. Niuertarfiuteqarfiup ilaasortaanut 10 millionit koruunit sinnerlugit agguaanneqarput

Brugsenip ilaasortaanut 10,3 millionit koruunit nalinginut agguagarsititsisoqarpoq (assi toqqorsivimmit)

Kalaallit Nunaanni Brugseni 10,3 millionit koruuninik agguagarsititsivoq, taakkulu aatsaat taama amerlatigipput.

Siorna 9,9 millionit koruunit agguaanneqarput, Brugsenimi aningaasaqarnermut pisortaq Niels Mathiasen Sermitsiaq.AG-mut oqarpoq.

Taakku tallimanngormat ilaasortanut 23.157-nut agguaanneqarput.

- Ilaasortat pisiami nalingisa 2 procentiat pissarsiarisarpaat. Kisianni aningaasanoornermut, soorlu Danske Spil, aamma cigaretsinut imigassanulluunniit agguagarsisoqarneq ajorpoq. Kaaviiaartitatta katinnerisa saniatigut siorna 800 millionit koruunit nalinginut tunisaqarpugut, taamaammat kaaviiaartitatta 1,25 procentiata missaa agguagarsianit akilerneqarpoq, Brugsenip aningaasaqarnermut pisortaa nassuiaavoq.

Agguagarsititsineq iluatsilluartoq Niels Mathiasen oqarpoq.

- Tallimanngormat kaaviiaartitagut siorna agguagarsititsinermut sanilliullugit amerlanerupput. Piumaneqarluarput, Brugsenimi aningaasaqarnermut pisortaq oqarpoq.

Brugseni nunatsinni 14-nik pisiniarfeqarpoq.

Powered by Labrador CMS