Brøndum atuarfiliornissamut millionit nalingannut aamma isumaqatigiissuteqartoq
Nuummi nutaamik atuarfiliornermi suliffeqarfik alla Kalaallit Nunaanneersoq millionit nalingannut aamma isumaqatigiissuteqarsimavoq. Tamatumuuna Brøndum A/S 60 millioner koruunit angullugit nalilimmik isumaqatigiissuteqarsimavoq.
Arssarnerit sapaatip akunnerani kingullermi nalunaarutigaat, Nuummi atuarfiliornissaq Danmarkimi suliffeqarfimmut Bravidamut suliassanngortinneqangajassimasoq, maanna Kalaallit Nunaanni suliffeqarfimmut tunniunneqarsimasoq.
Brøndum maanna isumaqatigiissuteqarsimavoq, ruujorilersuinermik, silaannarissarfinnik ikkussuinermik ledningilersuinermillu suliassaqalersimalluni.
Brøndum Grønlandimi pisortap Vagn Frederikseni nuannaarutigaa, isumaqatigiissut nunami maani suliffeqarfimmut tunniunneqarmat.
- Suliassap maani suliffeqarfimmut tunniunneqarnissaat ilimagisimavara. Tamanna ajunngeqaaq, aningaasammi nunami maani kaaviiaartinneqassapput, ingerlatseqatigiiffinnullu atuutereersunut aamma Nunap Karsianut tuttussanngorlutik, taanna oqarpoq.
Sulisut amerlanerit
Vagn Frederiksenip oqaluttuaraa, isumaqatigiissut 60 millioner koruunit missaannik naleqartoq, Brødumip ukiuni 38-ni Kalaallit Nunaanniinnermini isumaqatigiissutigisarsimasaasa annersarigaat. Taamaammallu sulisussanik amerlanerusunik pissarsiniartoqarniartoq.
-Ukiuni pingasuni sulisut 20-t missaanniittut sulisissavavut. Isumaqarpunga sulisussanikk 15-iniit 18-inut amerlatigisunik pissarsiniassalluta, Vagn Frederiksen.
Arssarnerit pisortaat Torben Nielsen assigalugu, suliassaq Islandimiumut Istakimut 2019-imi tunniunneqarmat nuannaarsimanngilaq.
-VMT Hørgaard neqeroortitsisoqarnerani ajorsarmat, taamalu suliassamik annaasaqarnerput ajuusaarutigisimaqaarput, pisortaq oqarpoq.
Nunaqavissunik sulisoqarniartoq
Taamaammat pisortaq oqiliallassimaqisoq arfininngormat isumaqatigiissummut atsiorsimavoq.
- Suliffeqarfimmut avataaneersumut, sivikitsuinnarmik maaneeriarluni aallaqqittussamut ajorsannginnerput nuannaarutigeqaarput. Uagummi ataavartumik maaniipput, sanaartornermilu inissisimaffipput tigummiinnarusullugu, Vagn Frederiksen oqarpoq.
Taassuma nunannaarutigaa, nunaqavissuunerusut suliassamik isumaginnittussanngortinneqarsimanerat.
-Sulisutta ilinniartuutittalu 80 procentiisa missaanniittut nunaqavissuupput. Suliassaq manna nunaqavissut pikkorissut pissarsiarineqarsinnaasullu atorlugit suliariniarparput, Brødum Grønlandimi pisortaq Vagn Frederiksen oqarpoq.