Pele Brobergip Belingskemit apersorneqarami oqaatigaa, naalagaaffiit innuttanut pisussaaffii naapertorlugit kalaallit inuiaat namminersulivinnissamut pisinnaatitaaffeqartut, nunasiaataasimanertik pissutigalugu.

Taamaammat innuttaasut inunnik tunuliaqutaqanngitsut namminersulivinnissaq pillugu taasisinnaatitaassanersut pillugu oqallittoqarnissaa Pele Brobergip kissaatigaa.

- Nunammi nunasiaateqarsimasut ingerlaannarusunnerlutik ingerlaannarusunnginnerlutilluunniit aalajangiisinnaatitaanissaat siunertarineqanngimmat, Pele Broberi Berlingskemut oqarpoq.

Pele Broberg nunanut allanut naalakkersuisuuvoq IA-millu aqunneqartumik naalakkersuisooqatigineqartut Naleqqakkut ilaasortaaffigalugit.

- Nunamut nuussimasutut qanoq isumaqarneq pingaaruteqanngitsoq

Oqaaserisimasai IA-kkormiut nuna tamakkerlugu ataatsimiinneranni tupaallaatigineqarsimapput, aviisimi Sermitsiami politikkikkut aaqqissuisoq Jensine Berthelsen oqaluttuarpoq.

Jensine Berthelsen naapertorlugu, Naalakkersuisut Siulittaasuata Múte B. Egedep oqaaserisimasai akerlilersimavai.

Pele Brobergip Berlingskemut oqaatigaa, soorunami 'thailandimiut, danskit, tuluit, franskit allallu maani najugaqartut namminersulivinnissamut pisinnaatitaaffeqanngitsut. Inuit pisinnaatitaaffeqartut oqaatigalugu. Nunamut nuussimasutut qanoq misigisimaneq qanorlu isumaqarneq, taasisinnaatitaaneq pillugu oqallinnissamut pingaaruteqanngillat'.

Brobergip oqaatigaa, inuit taakkulu kinguaavi innuttaasut 94 procentiisa missaanniittut:

- Ikinnerussuteqartut 4.000-it missaanniipput, taamaammat taakku amerlavallaanngillat. Immikkoortitsinissarpulli ilimananngilaq. Imaassinnaavoq kikkut tamarmik taasitinneqartut, Pele Broberg Berlingskemut oqarpoq.

Naatsorsueqqissaartarfik naapertorlugu, Kalaallit Nunaanni juulip aallaqqaataani innuttaasut 56.653-inik amerlassuseqarput, taakkunannga 6.158-it Kalaallit Nunaanni inunngorsimasuunatik.

Broberg: Oqaaseqaatimma ataqatigiinnerannit peerneqarsimavoq

Pele Brobergip Sermitsiaq.AG-mut oqaatigaa, kikkut taasisinnaatitaassanersut aalajangiiffigissallugu nammineq siunertarisimanngisaannarlugu:

- Namminersulivinnissamut kikkut taasisinnaatitaassanersut imaluunniit kalaallit inuiaat kikkuunersut aalajangiiffigissallugu siunertarisimanngisaannarpara. Inatsisartut Tunngaviusumillu Inasisissaq pillugu Isumalioqatigiissitat tamanna aalajangertussaavaat, taanna oqarpoq.

- Isumaqarpit inuit Inunnik tunuliaqutaqanngitsut namminersulivinnissaq pillugu taaseqataasariaqanngitsut?

- Naamik, naatsumik oqaatigalugu oqaaseqaatimma ataqatigiinnerannit tamanna peerneqarsimavoq, tusagassiortup oqaaseq 'kalaallit inuiaat' paasisimannginnamiuk, taamaammat tamatumunnga isummersimannginnera tusagassiortumut nassuiaatigisariaqarsimavara, Pele Broberg Sermitsiaq.AG-mut oqarpoq.