Broberg piginnittuunermut politikki pillugu: Naleraq isumaqatigiissummi takusinnaanngikkaa
Naleraq Inatsisartuni partiini kisiartaalluni Namminersorlutik Oqartussat ingerlatseqatigiiffiinut piginnittuunermut politikkimut nutaamut killissaliussatut isumaqatigiissummut ilaanngilaq. Naammaginartumik tigussaanngilaq, siulittaasoq isumaqarpoq.
Naleqqap siulittaasua Pele Broberg killissaliussatut isumaqatigiissummut, Inatsisartuni partiit allat sisamat Namminersorlutik Oqartussat ingerlatseqatigiiffiutaannut piginnittuunermut politikkimut siunissamut isumaqatigiissutaannut annerusumik isornartorsiugassaqanngilaq. Naleqqalli isumaqatigiissummut atsiornissaanut naammaginartumik tigussaanngiinnarpoq, taanna nassuiaavoq.
- Suliamut naammassinissaata tungaanut peqataanerput aamma ilanngussassatta ilanngunneri nuannaarutigaarput. Kisianni naggataatigut isumaqatigiissutip tigussaanngippallaarnerani, isumaqatigiissummi uagut ilanngussatta tikkuarsinnaannginnerat unammillernartoqarpoq.
Naleqqami siulittaasup oqarnera naapertorlugu, isumaqatigiissutip taama siamasitsiginerani piginnittuunermut politikkip inernera qanoq issanersoq nalunartoqarsinnaavoq. Piffissamilu aggersumi suliarineqalerpat, Naleraq aamma ilaassanngilaq.
Killissaliussatut isumaqatigiissummi naggasiutigalugu allaqqavoq, piginnittuunermut politikki Naalakkersuisut suliaralugulu akuerissagaa, ingerlatseqatigiiffiit maajimi ileqquusumik ataatsimeersuarnerisa aallartinnissaannut taanna piareersimassaaq.
Agguagarsiassanut politikki
Pele Brobergip immikkoortoq agguagarsiassanut politikki tigussaanerunissaa kissaatigigaluarpaa, tassani isumaqatigiissummi agguagarsititsisarnermut politikkimik tamanut tunngasumik oqaasertaliisoqarsinnaanngitsoq allaqqasoqarpoq, ingerlatseqatigiiffiit assigiinngitsorujussuummata. Agguagarsiassanut politikki piginnittuunermut isumaqatigiissummi ersarissarneqartassasoq aamma allassimavoq, ingerlatseqatigiiffiillu ataasiakkat agguagarsiaqartitsisarnerinut politikkiinik ataatsimeersuarnerni aalajangiisoqartassasoq.
Killissaliussatut isumaqatigiissut tassani itinerusumik nassuiaasinnaagaluartoq, Broberg isumaqarpoq.
- Ingerlatseqatigiiffiit nunap karsianut agguagarsiassanik tunniussaqartassanngitsoq, ersarissumik kissaatigaarput. Ingerlatseqatigiiffik qanoq ittuugaluarpalluunniit taanna allanneqarsinnaavoq.
Partii ingerlatsinermut imaluunniit sinneqartoorutip annertussusaanut, imaluunniit sinneqartoorutit qanoq annertutigisut atuisunut akinik appartitsinissamut atorneqarsinnaanerinut akuliukkusunngitsoq, Pele Brobergip oqaatigaa.
- Kisianni ingerlatseqatigiiffinni sinneqartoorutit ersinngitsumik akileraarutitut atorneqartarnerat unitsikkusupparput, taamaalilluni ingerlatseqatigiiffiit immaqa akisunaarisassanngillat, taarsiullugu innuttaasunut eqqortumik appasissumik akeqartitsinissaq sammissavaat.
Paasitinneqarsinnaatitaaneq pingaaruteqartoq
Killissaliussatut isumaqatigiissutip tunngaviusumik aallaavinnik oqaasertaliisoqarnissaa nassuiarneqaraluaraa, agguagarsiassanik qanoq ilinerani akiliisoqartarssanersoq aamma ingerlatseqatigiiffiit sinneqartoorutit innuttaasunut iluaqutaasumik taarsiullugu atorsinnaagaluartut, taama pisoqassanersoq ersersinneqanngitsoq, Pele Broberg isumaqarpoq.
Ingerlatseqatigiiffiit ataasiakkaat atanissaannut tunngasunik killissaliussatut isumaqatigiissummi isummertoqareernissaa neriuutigigaluarpaa.
Naleqqap illuanik ammasuunissamik isertuaatsuunissamullu nassuiaatit nuannaarutigai.
Namminersorlutik Oqartussat ingerlatseqatigiiffii paasitinneqarsinnaatitaanermut ilanngunneqarnissaat uagutsinnut pingaarutilerujussuuvoq, taamaammat tamatuma pinissaa pillugu suliniummik aallartitsisoqarniarnera isumaqatigiissummi allaqqammat pitsaasuuvoq.