Broberg Løkkep ernumassuteqarneranut: Peqqusersiornerujussuaq
Lars Løkke Rasmussenip inuit nalunaarsorsimaffeqalernissaannut nangaassuteqarnermini, danskit naalakkersuisortaavisa Kalaallit Nunaannik noqitsiniarnerannik isumaqartoq aamma peqqusersiornerusoq, naggueqatigiit inuit nalunaarsorsimaffeqalernissaannik siunnersuuteqartoq isumaqarpoq.
Folketingimi oqallittoqarnerani nunanut allanut tunngasunut ministeri Lars Løkke Rasmussen, inuit nalunaarsorsimaffeqalernissaannut Naleqqap siunnersuutaanut ernumassuteqarnerarpoq.
- Assersuutigalugu inuit nalunaarsorneqarfissaat pillugu siunnersuummik aamma immikkut inuiaassuseq innuttaasunik nalunaarsuinermut aallaavigineqarnissaanik eqqarsaatit tusaallugit, taava uanni nangaassuteqarnermik pilersoqartarpoq, tassami aamma inuit pisinnaatitaaffii tunngaviusut aamma alapernaarsorneqartussaammata, sapaatip akunnerata siuliani Aki-Matilda Høegh-Damip (S) isummersoqartiginerani Lars Løkke Rasmussen oqarpoq.
Pele Broberg inuit nalunaarsorneqarfissaannik siunnersuuteqartuuvoq, Lars Løkke Rasmussenillu oqaaseqarnera peqqusersiornerusoq oqaatigaa. Brobergip oqarnera naapertorlugu, Danmarkip Inuit kalaaliusut tunngavilersoreerpai. Tamatuma saniatigut Danmarkimi innuttaassuseqalersitsinissamut sukangasunik inatsiseqarpoq.
Danmarkimi innuttaassuseq kingornunneqartartoq, Brobergip innersuussutigaa. Tassa meeqqap angajoqqaavi danskisut innuttaassuseqarunik, taava meeraq aamma innuttaassuseqalissaaq.
Broberg: Inuit nalunaarsorneqarfiat innersuussummut naapertuuttoq
- Tassa imaappoq, inuit nunanit allaneersut Danmarkiliarsinnaanngillat, taamaalillutillu innuttaassuseqalerlutik, Pele Broberg oqarpoq.
Kalaallit ullutsinnit danskisut innuttaassuseqarput.
Brobergip oqarnera naapertorlugu, naggueqatigiit inuit nalunaarsorneqarfiat Namminersorneq pillugu Isumalioqatigiissitap isumaliutissiissutaanut naapertuutissaaq. Nalunaarsuiviup taassuma siunnersuutaa naapertorlugu, kikkut kalaaliunersut nalunaarsussavai, taamaalillunilu siunissami kalaallit naalagaaffianni innuttaassuseqalersinnaallutik. Nalunaarsuiviup aamma Kalaallit Nunaanni namminiilivinnermut taasisinnaallutillu Inatsisartunullu qinersinermi qinersisinnaassapput.
Kalaallit inuiaat 'nunap inoqqaavinik aamma allanik kalaallinik imminut taasinnaasunik' inuttaqartut, Lars Løkke Rasmussenip oqallinnermi oqaatigaa.
Isumaqataanngilluinnartoq
Pele Broberg isumaqataanngilluinnarpoq, Løkkellu taamatut oqaaseqarnermini nunatsinni nunatta iluani pissutsit akulerukkai isumaqarpoq. Nunanut allanut ministereqarfiup 2004-mi nassuiaataanut innersuussivoq.
- Aallartitat nunasiap naalakkersugaanera naapertorlugu, aallartitaaffigisaminnit allaanerusumik kinaassusilittut oqaatigisinnaanngitsut, ministereqarfiup erseqqissumik akissuteqarfigaa, Pele Broberg oqarpoq, nangillunilu:
Allat kalaallisut innuttaassuseqalersissinnaalerniarlugit inatsisinik kissaateqartoq
- Nunasiaataajunnaarsaaneq aamma inuiaassuseq siornatigut misissorneqareerput, tassanilu nunap inoqqaavi ingerlaannaq nutaamik inuiaassuseqalissapput, Europamiut nunasiaatillit inuiaassusaannik inuiaassuseqaannassallutik, Pele Broberg oqarpoq.
Kalaallit innuttaassuseqarnerat naggueqatigiit inuit avataatigut qanoq tunniunneqarsinnaaneranut inatsisinik kissaateqarluni, politikeri naqissusiivoq. Inuup Kalaallit Nunaanni qanoq sivisutigisumik najugaqarsimaneranut tunngatillugu inatsisaasinnaapput, allallu. Danmarkimi innuttaassuseqalernissamut inatsisit assingusut atuupput.
- Danmarkip FN-imut inatsisaannut tapersiinermik oqariartuuteqarnera eqqarsaatigalugu tamanna pissusissamisuuginnarpoq, kalaallisullu innuttaassuseqalersitsinermi danskisut innuttaassuseqarnerup annaaneqartussaanera, Pele Broberg oqarpoq.
Politikerip inuit nalunaarsorneqarfiannik siunnersuutaa upernaakkut ataatsimiinnermi suliarineqarnissaa naatsorsuutigineqarpoq.